《八十後回憶錄：超頻》

牛牛講起電腦燒底版，唔知點解我突然又諗起Ｄ老餅野：超頻。
　
以前窮拎人家，超頻唔單止係男人既浪漫咁簡單，甚至係有一種實際需要係入面。部機真係慢，＄又唔夠，想出下旁門左道提升性能，對於男性黎講，呢四隻字往往都有非一般吸引力。當大家回想下，番返去以前仲買書學點砌機既歲月，一邊仲係度努力緊點樣搞主機殼插卡唔會界損手果陣，一定身邊已經有另外一班痴線友，靜靜地起革命，係度日夜興奮講自己今日成功地超左幾多頻，點樣先可以有更好既散熱心得。我地簡稱呢班叫超頻痴線友。
　
其實咩係超頻呢？最簡單既講法就係，電腦粒ＣＰＵ本身有行開既一個ＨＺ數，咁有時覺得ＣＰＵ唔夠快，咪嘗試谷佢上去囉？但唔係話谷就谷的，又要有專用黎超頻既版又盛，而且通常超頻都會令到個處理器出現過熱既情況，於是班痴線友就會想盡各種方法將粒Ｕ散熱。例如有一個特製既主機殼啦（甚至係唔裝啦，散熱更快）？加裝改裝風扇啦（可以幾部風扇都有，咁當然火牛都要升級啦）？加散熱膏或者散熱膠貼，甚至聽聞係有專登降溫既ＳＯＦＴＷＡＲＥ諸如此類，係層出不窮既。
　
超頻既野，簡單由ＳＥＴ下ＪＵＭＰＥＲ，到改ＢＩＯＳ，甚至自行加電壓都有。咁樣玩法，最後開到機，超到頻，運作暢順，即係蔗渣打出鵝髀級數，當然好有成功感啦。但出得黎行，亦預左要還，如果超頻失敗，粒Ｕ隨時就咁ＢＹＥ－ＢＹＥ，有時可能會炒ＨＡＲＤＤＩＳＫ，甚至連主機版都會死埋，想用ＦＬＯＰＰＹ（Ａ：！）　ＢＯＯＴ機都不能。所以果陣話幫女砌機，唔係為報復，都話千祈唔好亂幫人地部機超頻，就係咁喇。
　
但當然往往超頻友興奮完一陣，最後都只會自己同自己講：如果有咁既情況就好喇。每個男仔幫人砌機既背後，都有一段可歌可泣既故事。下次有機會再講。。。