《尋晚發夢我見到莊子》

尋晚發夢我見到莊子。佢輕衣飄飄，抱一巨石而坐。言談間，佢認為我唔應該再批評港豬太多。我申辯：
　
「點會呢，我自己既然都係港豬，又邊有資格評論其他人？」
　
莊子撥頭髮話：「無就最好。而且，唔單止你唔可以咁做，你要勸戒埋其他身邊既人都唔好咁做。能夠成為港豬係美事，點解要鬧？」
　
我急忙請教：「此話何解，可唔可以再提點一二？」
　
莊子哈哈大笑：「我唔怪你，你根本就無讀過我既著作，例如齊物論等等。而我知道你亦唔係哲學人，同你講太多都唔會有意義！」
　
「你尋日引到我庖丁解牛講養生，都算係咁。但好簡單，我既思想，係追求精神上既絕對自由，擺脫塵世間既所有束縛。所有人為之事，都係虛偽。做人最緊要隨心而發，率性而為。所以人為既相對，就係無為。」
　
我面上可能無法掩飾自己既不明所以。於是莊子瞪左我一眼：
　
「係我活係世上既年代，何嘗唔係政局紛亂，戰事連連既混沌時代？同你地依家所身處既水深火熱，都叫做有少少相似。但只要了解世界一切既自然法則，生死有命，就算四周圍既野幾咁動蕩，處之泰然。追求呢種至高無上既自由，就係我所提倡既道既境界。」
　
我已經唔識點樣接上去，咁夜又唔可以急ＣＡＬＬ哲學仔：「你既意思係，港人照樣漠視大小時事，照去返工諗夜晚食乜野，同你死左老婆，鼓盆而歌差唔多。。。」
　
「大致係咁啦。同埋，我一早已經講左啦，依家政治既野，錯晒！以知治國，係大亂之本。千世之後，必然仲有人食人之事，我所講得無錯掛？所以，你一定要勸下其他人，做人最緊要唔好理太多。當然你唔勸都得。隨你。」
　
我嘗試拋一拋書包：「係咪即係范仲淹所講既不以物喜，不以己悲？」莊子聽左，一面憤怒：
　
「死讀儒家思想既官場小子，點可以同我相提並論？」佢拂袖而去。夢就咁完左。