《萬聖節講食鬼》

講起萬聖節，講起鬼，我其實好鍾意食鬼ＧＡＭＥ（ＰＡＣ—ＭＡＮ）入面果堆鬼。
　
以前係葡京賭場有得打食鬼你知唔知？都唔係只係得堆爛賭鬼係度努力博殺，希望廿蚊港紙贏三百萬美金去參加慈善啤王大賽架。係最古老果隻，即係黑色畫面完全２Ｄ一個平面果種。你咪控制住隻食鬼，係度行勻個迷宮食晒Ｄ豆去過關囉。但呢個世界梗係無免費午餐啦，食豆既同時，就係要逃避果四隻鬼係中間大本營衝出黎對你既追殺。
　　
Ｄ鬼係得一對眼，而且係無腳，永遠都係下面波浪形咁郁郁下以表示佢地一直移動緊。但其實佢地個樣一Ｄ都唔恐怖，仲好ＣＯＬＯＵＲＦＵＬ好似幾可愛咁添。但只要一掂到佢，食鬼就會即刻俾佢地溶左，死狀十分慘。但當然，情況都唔算完全係一面倒既，當你食左大豆之後，Ｄ鬼就會驚到「藍都面埋」，開始四散而逃，咁你就可以係限定時間內追番佢地轉頭。
　　
以前既遊戲既演算方法當然係相當簡單。當你一進入無敵時間，Ｄ鬼就會即刻持相反方向遠離你，換句話說如果你想去食左佢地，都係好容易就可以估到佢地既逃生路線。但食完係咪一勞永逸呢？又唔係，因為佢地會無左實體，得番隻眼，然後飄番去大本營，又再復活，又可以衝番出黎同你死過。大力豆一個地圖得四粒，而且時限會隨關數愈黎愈短，鬼可以無限復活，你話隻ＧＡＭＥ係咪好ＰＫ先。。。
　　
（既然會復活咁仲追殺Ｄ鬼黎有乜用。。。）
　　
ＷＥＬＬ，舊時Ｄ　ＧＡＭＥ，就係咁無聊。但都足以夠我地去玩餐飽。除左食豆、同埋等俾鬼圍死，ＧＡＭＥＯＶＥＲ之外，你別無其他選擇。當然，佢有時會獎Ｄ車厘子呀生果你食，但果Ｄ野除左多個分之外都係完全無用，更加唔會獎多隻生命，或者俾你有咩特殊技能，唔好傻啦。講下講下，隻ＧＡＭＥ咩又咁似人生既？