《我自己都有份工番搵到錢架嘛》

我記得畢業之後出黎第一份工，就係係Ｙ行到做個文員仔，果陣收既人工係大致一皮（港紙）。ＯＴ長當然唔在講，而果陣我已經同依家既塔嫂拍緊拖。其實我一直都唔係好明點解佢唔飛左我。ＬＯＬ
　
塔嫂屋企雖然講唔上好富有，但係屋企都從來唔需要憂柴憂米，當然講將來梗係好長遠啦，我亦都從來唔敢話應承Ｄ乜，大佬呀，你講還講，要兌現到先得架嘛。唔係開空頭支票黎都無用啦。有一次佢過黎中環搵我食飯，果日我又做得灰灰地，岩岩先俾老細周完，梗係對住豆腐火腩飯都無胃口啦。「其實你跟住我，再咁落去，捱硬苦架喎？」雖然係有少少賭氣，但我又覺得自己講緊事實。
　
但係塔嫂佢無講Ｄ乜。只係一直默默咁食住飯，又唔係發火，但係又無咩表情。我又開始為我岩岩講野咁衝，有些少後悔，對住碗咩合掌瓜味精中湯，都真係一時間唔知講咩好發晒吽哣。唔知隔左幾耐（頂都唔方耐啦個ＬＵＮＣＨ　ＴＩＭＥ有幾長？又就快開市），塔嫂就突然話喇：「我又唔信自己會捱苦喎。」「下，點解？」
　
當你以為塔嫂會好好地勸我加油呀，你一定有出頭既一日架，果陣少年你就真係太年輕了。「因為我自己都有份工番搵到錢架嘛。」
　
「。。。」「又同埋，你駛咩咁快咁擔心我地既將來呢？我真係一Ｄ都唔擔心喎。」然後佢就笑了，「你不嬲都負負碌碌架啦。依家搵一皮野，個個出黎做野都係得咁多架啦，但未來係會發生咩事，無人會算得準架喎。」其實點解佢唔直接Ｄ講，話相信自己既眼光，可能我會仲開心？ＷＥＬＬ。其實佢又一直都係唔會好識安慰我果種人。但結果，我又決定繼續去做牛做馬了。
　
過左咁多年，我懷疑呢段小插曲，塔嫂依家仲有咩印象。但今日提番起，如果真係要求一個男友人工要超多幾多幾多銀既話，我諗我都唔會同到塔嫂係一齊。塔嫂既存在，正正證明港女，都有唔一定著眼係錢咁Ｑ膚淺既。只不過世間比較罕有唶。所以我岩岩亦絕對同意有網友講，我的確係相當幸運，平時跪下玻璃，又有咩所謂？
#星期五OT #放閃最適宜