《關於道德》

由細到大，華人教小朋友「尊重」嘅概念，大概都係圍繞尊敬長輩、師長，換言之，姐係服從權威，遵從已訂下嘅規則。我敢講，香港嗰套教育，係絕少會教人「尊重其他人的選擇」、「尊重其他人的權利」嘅。反而，華人好鍾意攞自己嘅仔女同人地比較，睇下邊個更符合社會嘅規範（例如做到醫生律師），而唔係邊個更有個性，活得更開心自在。

呢種充斥整個社會嘅無形壓逼，令我地不知不覺變到同倒模無異，即使想行一條唔同嘅路，都礙於要顧及社會規範，而被逼折翼，最後按社會嘅方式生存、工作、死去，麻木地做一個安份守己嘅奴隸，一個「正常」又平庸嘅人。無錯，有群體嘅地方，就會有規矩，明文法律好，文化潛規則也好。呢d規矩可以好有用，例如確保社會有一定嘅穩定性。

但依家嘅問題係，好多人只係internalize完呢d道德規範，但從來無思考過，究竟呢d規範係咪已經不合時宜，甚至會害到人。

以關愛座為例，本來係想令社會更有愛，更有互助精神。但當道德規範以紅底黃字嘅「關愛哈哈笑」浮上水面，反而令大家更容易喺未瞭解情況下，成為道德判官，名正言順批鬥唔讓座嘅年輕人。如果佢扭親腳呢？如果佢已經翻左12個鐘shift呢？如果佢M痛到就暈呢？唔重要的，總之佢唔讓座就係唔岩，放佢上網公審吧。

當有人仗住「道德」變得如此囂張跋扈，得到嘅效果正正係相反：由體諒他人嘅需要變成武斷，甚至失去本來應有嘅同理心。

又以女性身體自主為例。現代香港女性，已經唔再係男人嘅附屬品，我地受過教育，具備經濟能力，法律、政治上都（叫做）有平等嘅權利。以法律為例，強姦案例已將法律條文中，暗示女人為男人財物嘅字眼無效化，所以，依家男人唔可以以「佢係我老婆」為理由強姦女人（以前結左婚就乜都得），意味住，即使係已婚，女人都係一個掌握自己身體使用權嘅獨立個體，唔屬於任何人。

可惜，就算法律行到呢步，就算我地解放到女人嘅勞動力，利用到女人推高gdp，卻無解放到女人嘅思想同身體。每當一個女人越過道德規範，好多人就會大驚小怪，喺我個case，甚至係群起攻之，恨不得將我欺凌至死。遵守道德，並無令佢地更有同理心，或思考到更加多道理，反而，佢地變成一班充滿仇恨，酸臭怨毒嘅人。

佢地會認為，女人一定要以某種保守曖昧嘅方式表達自己，一旦越界，就係唔道德，就係做雞，就係搏上位，就抵俾人公審。其實，真係唔洗以己度人的，人地嘅選擇，你可以尊重嗎？女人以非傳統嘅方式表達自己，甚至真係去做雞，去吊狗公，去濫交，可以有好多原因，唔只一個分析面向的，表達自己好，討好他人好，只要無影響到你，出少句聲真係會啞咩？膚淺咁滿足完自己人身攻擊人嘅快感，最後得到左d咩呢？更何況，你好瞭解一個陌生人咩，你又係完美架咩？Who on earth are you to judge?
你咁樣對得人，係鞏固緊一個審判嘅風氣，他日你同樣有可能自己受翻。

各花入各眼，我唔係一個好靚嘅人，更加唔係咩女神，唔需捧高我然後引一班人黎踩。不過重要嘅係，如果唔靚唔完美就唔可以露肉，唔可以露樣，無衣著嘅自由，咁不如立法規定人人都要通過美麗測試，否則要用黑布由頭包到腳先出街？活在一個壓抑封閉嘅社會，人人都要一式一樣，只會越來越無inspiration，越來越唔開心，難道呢個就係我地嘅烏托邦？

道德，可以係自己嘅引路明燈，一旦利用道德黎攻擊他人，規範他人，只會令自己嘅視野變得越來越狹隘。例如我，係一個認為家庭好重要，同埋身體只可以交託比愛人嘅人。所以，有d道德底線我會要求自己守，例如我會努力抽時間陪家人，亦無興趣一夜情、搵SP。不過，我絕對唔會要求其他人同我嘅價值觀一樣。有人唔孝順，可能係因為父母傷害過佢，無比愛佢。有人隨便同人發生關係，可能因為寂寞，可能貪玩，可能唔相信愛情，可能純粹性格唔同，或者成長背景導致價值觀唔同。無問題的，呢個係佢地嘅人生，我唔會因為自己有一套道德價值觀，就要求其他人跟隨，或者走去批鬥人，who am I to judge？待人以寬，律己以嚴。可惜，現實中好多人往往係本末倒置，自己唔完美，但對他人卻異常嚴苛怨毒，真係好可悲。

所以，次次有人大規模批鬥我，都係我繼續堅持講呢d野、post埋d踩界野嘅動力，根本唔可以退。我知我改變唔到呢個世界，大部分人都係睇完圖鬧我豬西，欺凌我，人身攻擊我就算，但總有一兩個人會搵到共鳴同安慰，總有一兩個人會比我影響到，開始放低自己把尺，學識尊重人。異想天開咁諗，或者可以將我呢套想法人傳人傳開去，慢慢帶黎一d改變呢。其實咁樣就足夠了。

最後，雖然網絡上d陌生人對我莫名其妙地差，不過我無乜野的，離開左網絡，我有好多值得我自豪嘅野，例如對我好好嘅家人同摯友，我知道自己有咩才能同長處，亦樂於發掘自己嘅缺點並且不斷嘗試改善，我有我嘅目標，有我想宣揚嘅理念，雖然有時好辛苦或者有d迷失，但總括而言我活得好滿足好開心，亦知道自己做緊乜的。