《昔日金庸，今日香港》

呢篇文係睇左方大大講金庸之後突然靈光一閃寫既。我都想突然寫下金庸。一直未有時間貼出黎唶。
　
神雕俠侶成書係香港既六十年代，但係想法到今時今日，仍然適用（五十年不變）。其實入面亦不外乎講 #愛就係選擇，#選擇就係捨棄。我唔係講玩，係真的。如果唔係咩叫問世間情是何物，直教生死相許？並唔係老土野黎，就係話我愛你愛到連自己條命都可以唔要。當然呢個係小說啦，現實無咩人做到啦，但呢個當然就愛既最高境界。無死讀書既都不難看出，其實古墓派掌門，係個終極港女，佢自己得唔到愛不特止，仲要求佢既女弟子都同佢癲埋一份，要一直匿埋係活死人墓，唯一可以破戒既方法，就係有男人肯為佢地而死。心諗ＷＴＦ？呢個第一點。
　
第二點，當然係魯迅既禮教吃人。明明楊過同小龍女本身可以幾百字就完左個故仔，點解搞左咁多離離合合？就係因為同依家個世界一樣，旁人議論紛紛，有人搞局。不止有一次有金學人士指出，武俠世界就係現實世界，武林就係權力，權力就係政治。於是所有搞政治既人，就算本身光明磊落，為正義（ＷＨＡＴＥＶＥＲ　ＹＯＵ　ＣＡＬＬ　ＩＴ）而戰，都少不免會耍下手段，好讓自己既門派（政黨）得益。堂堂武林高手，當然要言行舉止合乎規範（ＷＨＡＴＥＶＥＲ　ＹＯＵ　ＤＥＦＩＮＥ　ＩＴ），講句扑野就梗係唔得（根據黃蓉姨講，叫苟且之事）。再加上楊過本身個老豆就一早俾人標籤左係賣國賊，佢被定落黎既罪，仲要由個仔黎去繼承，難怪人都癲。
　
所以，再仔細Ｄ睇，小龍女雖然仙氣爆發，武功蓋世，用情專一，白衣一襲走足出場尤如仙女下凡，但其實係今日既香港，佢一樣會受唔住超大壓力，隨時自刎身亡。先簡短回顧佢既一生：孤兒，俾一班變態港女老太婆所救，被灌輸各種扭曲思想，然後收左徒弟，相愛，下山，被姦，［被重傷，（以為）被拋棄］ＸＮ。最後都係自盡既，仲要叫人等佢十六年。大佬普選雖然都唔止等左咁耐，但時間已經夠打幾次世界大戰。我相信金庸唔係想配合市場需要，大玩ＢＢＱ情節，大團圓結局，小龍女本來就係一定要死。
　
（補注：但結果佢係犧牲左全書性格最好最良善既角色：郭襄，慘收好人卡。結果又造就另一個終極港女門派係下一集倚天再遺害人間。）
　
如果尹志平（係要用舊版名吹咩）當日污辱（ＷＯＷ　ＳＯ　ＯＬＤ　ＳＣＨＯＯＬ）呀小龍女果陣有拍片，放左上網，佢一定俾人定義係雞係公廁，俾高登仔鬧到痴線（唔係處，唔得架）。然後師生戀，又係罪犯天條。楊過不斷開後宮，佢都仲不離不棄，更加會俾某Ｄ人覺得佢搞到自己ＣＨＥＡＰ晒。更加唔好講佢不斷衝擊武林入面既議事規則。所以睇金庸，唔係死讀書咁睇架。
　
只係你學我咁睇完，你會更憎呢個世界：其實無進步過。