《好客之都，關愛大眾》

港鐵近黎負面新聞咁多，形象開始低落，梗係認為搞多幾個關愛座對於企業黎講，係表示對社會既關心同埋責任啦。佢地一定係咁諗。
　
現實Ｄ講，用關愛座既針對人士，不外乎係長者、大肚婆、照顧細路人士、傷殘同埋攜帶大型重物既人。其他人就算中左七傷拳，內裡吐血，表面無事，但都唔可以侵犯關愛座聖域，否則網上一輪口誅筆伐，人生隨時玩完。睇唔開既就了此殘生，你都唔好話係一個咁扭曲既世界入面，呢Ｄ會係小事。
　
觀乎依家關愛座已經唔係成日有人坐，香港出生率全世界接近最低，所以大肚婆唔會ＢＥＮＥＦＩＴ好多。我相信依家既位既數目，亦足夠讓傷殘有餘，因為佢地應該係ＴＯＰ　ＰＲＩＯＲＩＴＹ。換句話說一係就無人坐，俾老人，一係就俾攜帶大型重物行李既，即係旅客居多。咁再諗落去，呢個一定係大趨勢黎既，香港的確係愈黎愈多老人同遊客呀嘛。佢地無算錯死草既。而老人仲有兩蚊搭車，政府補貼（即係你）。鼓勵多Ｄ老人家搭港鐵，真係無壞。
　
成件事係理直氣壯架。遲Ｄ咪真係索性全部都變關愛座囉。反正一開始用紅色，就已經講到明警告你地班人咪亂坐，隨時坐左都會出事。一係你就易容或者日日拎住士的出街囉。
　　
好客之都呀嘛。銀髮經濟呀嘛。你地年青人呢堆，係乘客群入面係小眾渣，邊個得閒理你地呀。唔該。