《中環嘅堅尼系數》

我地成日都話收入差距好嚴重，又堅尼系數又盛，但其實都係講唔出個圖像究竟有幾真實。個差距大到一個咩所以然。係香港，唔好話全港九咁數，單係中西區呢個豆膶咁細既地方，個收入差距都已可以闊個維多利亞港，尤其是做金融呢行，只要你識既人夠多，就咁係某一個ＳＰＥＣＴＲＵＭ到睇，你已經會睇到好多野。
　
金融呢樣野就係可以係虛無飄渺既野上面生金蛋，突然產生好多好多錢出黎，但其實大部份既錢都係落左最上面果幾個袋，其他下面最辛苦去揼石仔既，反而係得個零頭。舉例，就譬如最新岩岩推出既ＢＩＧ４ＳＥＣＲＥＴ，披露番入面依家一入去捱騾仔既後生仔女，頂佢個肺咁多年黎都係加得果一二千蚊，得果皮幾野，心諗有無拎搞錯？唔係講ＣＡＲＥＥＲ　ＰＲＯＳＰＥＣＴ（又係講Ｘ年升Ｍ，Ｙ年升ＳＭ果Ｄ相信依家仲講緊，你俾人ＳＭ就有份）真係仲衰過去自己搵份私人補習。加上咁變態既工作環境，入面真係有幾絕望得幾絕望。
　
我曾經有個係Ｄ字頭做既師妹，真係有一個夜晚係海富既麥記對住我喊晒（終於到最後係ＱＵＩＴ左），話真係好難頂，牌又未有，書又無時間讀，完全睇唔到將來，但自己既黑眼圈已經開始用咩護膚品都遮唔到，更加唔好話可以儲到Ｄ咩錢去下旅行甚至首期？「幫自己訂副紙皮盒就得。」果陣真係見佢咁既樣真係驚佢會自殺。但另一邊廂呢？另一邊廂又點，又有另一個ＦＲＤ子，係對面ＰＰ租左個甲級寫字樓辦公室自己出黎幫大陸公司專搞法律事務，全海景，勁多生意，發到豬頭丙，一單刁已經係岩岩講師妹仔既Ｎ個月人工，日日都香格理拉食ＴＥＡ，自由返放工，仲有時間去美銀果邊做個ＧＹＭ先，問你點頂？
　
所以，你唔好以為香港Ｄ豪宅，真係全部靠晒大陸人去托住。真相並唔係咁。一樣有香港人靠北水致富。例如點解有咁多人仆出黎做地產仲要打晒交？？一間獨立屋隨時一兩億，只要抽５％佣一單ＴＲＡＮＳＡＣＴＩＯＮ已經係五百萬。香港有一堆人努力想驅蝗，之但係其實有另一班人不知幾鍾意佢地，你估只係得零售業係咁？你睇下如果無左上面落黎水（你話污糟又好乾淨又好），會有幾多基金公司證券公司各種各樣融資其他公司全部執笠？
　
貧富差距，有時唔駛話同深水步比所以。好多人都好仰慕去中環一帶返工。但置地廣場行黎行去，咁多人，亦一早有晒階級地位身份俾人自動標籤晒，呃唔到人的。有人早放去陸羽食到三點先施施然，有人就仆到去大快活排隊。世道如此。問點解個制度去到依家都仲會ＳＵＳＴＡＩＮ到？都係果句，答你唔到。香港同強國，早成共業，亦非一朝一夕。