《賣遮嘅老先生》

睇ＶＩＵＴＶ一個節目，叫屢見耆工。有一集，講有個係深水埗賣遮既先生，叫威哥。佢既做生意手法，係今時今日，完全係不可思議。
　
我唔知佢幾歲，應該都六十幾七十咁上下，一面白鬚白髯，著住件短袖恤衫西褲，聲如洪鐘，目光如炬。佢話佢祖上自香港割讓俾英國果陣已經開始遮呢行生意。嘩，做左兩百幾年都仲屹立不倒，仲唔係咩大企業巨擘，港交所有ＮＯ未？ＳＯＲＲＹ，佢似乎滿足係自己間小店天地，而且有興趣教人點樣開遮收遮摺遮，多過賣。有人搵把遮拎俾佢修理，佢亦一概照收，但因為得佢一個人做，佢依家囤積左千幾把遮未整，更加強調死之前，一定整唔晒。
　
再訪問落去，先知道佢既做生意宗旨係「希望令到每一個買左遮既人能夠正確使用把雨遮，咁就可以確保把野可以用足一世」。呢個世界邊有Ｄ咁痴線既生意佬？人人只光顧一次，之後就唔駛再買，人口又一路老化落去，咁盤生意咪注定係若干年後執笠？係呀，威哥仲同咩地球之友既人合作，一齊去公共屋村到教人點樣ＤＩＹ維修把遮。呢度，佢強調自己係地球人，好應該為地球出番一份力。
　
佢話佢曾經收到唔少行家打黎警告，同佢講：你咁鍾意教人保養Ｄ遮，做咩唔快Ｄ上天堂教下其他人呀，佢地都唔識喎。但係威哥笑笑口，話佢對住呢Ｄ電話仲要道歉喎。係頂啦，今時今日，賺錢梗係王道，最好買果件野，個零幾月就壞，然後公司又出新ＭＯＤＥＬ，唔係點配合咩銷售ＣＹＣＬＥ同營業增長呢。威哥呢Ｄ，仲講環保，講珍惜，懷緬舊物既人情，梗係不合時宜架啦！
　
一句講晒，咪又係ＧＤＰ三個英文字母累事。好可惜威哥呢種人已經買少見少，亦都注定被標籤做壞人（時下興做好事既人都稱呼為壞人）。珍惜呢兩個字，筆劃數唔多，寫就記得寫，做就唔記得做囉。