(beta 公測版本)
< 返回

《做人要學識好好咁淨係愛自己》

作者:其他
日期:2016年8月17日

作者:choco

對我嚟講,做人嘅最大目標,就係學識好好咁淨係愛自己。

「嘩屌你咁自私嘅?淨係愛自己?咁你又話你好愛你女朋友?仲話自己本土派?」對我嚟講,「淨係愛自己」同愛女朋友、愛香港不但冇衝突,仲可以話根本係同一樣嘢。愛嘅反面並唔係恨,愛嘅反面係漠不關心,即係對一樣嘢完全冇感情。簡單講,你對沙地阿拉伯冇任何正負面嘅感覺,亦都冇興趣特別想知多啲,咁你咪唔愛沙地阿拉伯呢個地方囉。咁點樣為之愛?當你對一樣嘢產生感情嘅時候,佢就會成為咗你「自己」嘅一部分,咁你就愛佢喇。

換言之,愛就係令你唔係得個軀殼,真正似返一個人嘅嘢。如果你乜都唔愛,你就乜都唔會關心,你就乜都唔會付出,咁你嘅世界入面一切都冇「意義」可言。當你愛一樣嘢,你會關心佢,佢嘅利害會成為你嘅利害,即係話,佢會成為你嘅一部分。你愛你嘅伴侶,咁佢開心你會因而開心,佢失落你會感到失落,佢遇到好事你會為佢高興,佢踩屎你會想同佢分擔,佢成為咗你生命嘅一部分。有前人理解呢個道理,索性叫伴侶為「另一半」,就係咁嘅意思。同一個邏輯,其實可以應用喺其他嘢身上,無論係一件事、一個信念、一個地方。好似香港咁,我愛香港,香港係我嘅一部分,我唔想香港淪陷,所以我為香港付出同犧牲,當然對唔同事物嘅愛可以有唔同嘅程度啦。所以呢,愛自己就係愛你所愛嘅事物。我愛香港,所以愛惜香港就係愛自己。我愛我女朋友,所以愛鍚{女友名}就係愛我自己。

毛主席話:世界上沒有無緣無故的愛,也沒有無緣無故的恨。咁愛係點樣嚟?我相信,愛係由兩樣嘢組成嘅。

一、回憶。點解電視劇同動畫入面,啲角色領便當gg嘅時間,往往都係一幕幕黑白嘅跑馬燈畫面,回放一生中嘅重要回憶?點解我地講香港淪喪molamola嘅時候,都會講返以往英治時代嘅風光?因為回憶,構成咗我地對一個人、一個地方嘅愛。我覺得世上冇一見鍾情,坊間嘅一見鍾情只係衝動同執念嘅產物,當然呢種一見鍾情經歷時間都可以成為真正嘅愛[1]。愛係要經過時間,製造回憶去累積。

二、付出。學能神話齋:愛就係選擇。生命有限,你作出嘅選擇就係你愛嘅嘢。當你選擇嘅時候,必然會有opportunity cost,即係你嘅選擇必然導致你付出同犧牲一啲嘢,而呢個犧牲就係另一樣構成愛嘅嘢。譬如話,你為咗同女朋友一齊渡過多啲時間,決定唔去考試,犧牲咗你嘅成積,好多人話你蠢話你戇鳩,話你嘅付出同得著不符,但「犧牲就係意義」,你選擇放棄成績嘅一刻,相對地你嘅得著就必然有同等或更大嘅意義,他人冇辦法評價你嘅取捨值唔值得,因為你嘅犧牲本身就令佢值得。愛就係選擇,當你做每一個決擇嘅時候,你就愛緊一樣嘢。同樣地,當你選擇咗一樣你原先已經愛嘅嘢嘅時候,你都可以自豪咁講:你比以前更加愛嗰樣嘢。

恨,其實都係愛嘅一種。學能神話我地鍾意嘲笑中國隊,係暗戀中國,其實冇錯。試諗下,恨嘅本質,同我以上所講嘅有咩相似之處?你恨一樣嘢,你會關心佢,你嘅利害會同佢剛好相反。中國奪金你個暗嘆可惜,中國仆街你會拍手叫好。同愛一樣,你恨嘅嘢都係構成你嘅一部分。恨嘅形成,同愛一樣,都係緣於回憶同埋付出所致。之所以有咁多因愛生恨嘅事例,就係因為呢兩樣嘢咁源出一系。當愛扭曲咗,就成為恨。

咁點解要淨係愛自己?博愛啲,愛多啲嘢唔好咩?正如頭先都講過,人生有限,我地冇辦法愛哂所有嘢。有啲人好鍾意講大愛,講平等嘅愛,巴黎受恐襲,人人fb轉法國國旗,佢地就話叙利亞日日都發生啲咁嘅事,我地要關心就應該平等咁關心。但咁係冇可能,亦都係違心嘅。有人真係對敍利亞有感情,為佢地感到悲痛嘅,固然冇問題,但係刻意去講一啲唔係由心而發嘅說話,甚至迫人有同等程度嘅關心,嗰啲叫偽善[2]。其實除非聖人再世,我地作為人類冇乜可能做到真正嘅大愛,夾硬嚟只會係假嘅愛,而假嘅愛,因為冇犧牲冇付出,係毫無意義嘅。
唯有淨係愛返自己[3],我地先可以做到一個知行合一嘅人。

[1]:你嘅執念導致你為此付出同犧牲,「犧牲就係意義」,咁就成為咗真正嘅愛。
[2]:當然其實我都唔信咁多人對法國有咁深厚嘅感情,有啲人真係對法國、或者和平有愛嘅,但好多都只係跟風。
[3]:自己=自己所愛嘅嘢。

#本土哲學
#愛就係選擇
#學能教
#第一次寫寫得差唔好屌得咁勁
#鳩tag人

全文 1466 字 (唔計英文、空格、標點)