(beta 公測版本)
< 返回

《大班教學真係教到英文?》

作者:8020英文
日期:2016年8月14日

等我講個故仔先。

我平時每日都會胃痛,聽朋友講有間大型診所好出名嘅,於是我去咗嗰度睇醫生。呢間診所我未去過嘅,入面好大,企咗幾十個人。姑娘叫所有人入去一間大房,成間演奏廳咁。然後醫生就喺最前面,一個講台上面,講解常見問題,教大家洗手,講解感冒同傷風嘅分別,講咗好耐。我見場內好多人都流緊鼻水,有啲係咁咳,有啲睇落就病到瘟瘟燉燉,佢哋都係喺度碌電話,最多間中望一望個醫生。醫生講完晒,佢就話,「而家派 notes,入面有今日內容。如果係傷風咳嘅,飲飲入面啲湯水,再每隔四個鐘食一食第30版嘅藥丸就喇。」跟住醫生就消失咗喇。於是我咪問個姑娘囉:「我胃痛喎,你都冇講點做。」佢就答我,「胃痛呢啲咁複雜嘅問題呢,我哋兩個月後就會探討㗎喇。你專心學好洗手同醫好感冒啦!」我嘈佢,「喂,你叫得自己做診所,至少睇吓個病人做咩事先啦。你講嗰啲衛生常識,我上網都睇到啦。」姑娘就答喇:「我啲洗手秘技好精闢㗎,下次有咩災難都唔使驚呀!我哋幫你取得最佳健康㗎。」

如果你覺得成件事好黐線,冇可能存在。我可以話你聽,診所就未必有,但係類似嘅補習社都唔少。

入到大型補習社,如果係搵補習天王補英文,情況差唔多。每個同學都有唔同問題,有啲唔識文法,有啲發音唔好,有啲唔識串字,有啲冇心機學英文,乜人都有。大型補習社因為設計上嘅盲點,上堂好多時都係睇片,一切學一模一樣嘅嘢。老師,就好似上面個醫生咁,連每個學生有咩問題都唔知,只不過係透過兩樣嘢: notes 同 video,去將佢啲貼士,佢啲理解,話俾學生知。好多人就唔理自己有咩問題,總之就定時定候坐入個課室,睇住片入面或者隔咗十幾行嘅補習天王講解。但係如果我係學生,我覺得自己有啲嘢跟唔上,我諗你都想有人話你知有咩問題,而唔係連關心都冇句啩?

當然上堂可以學到好多嘢。並唔係話佢哋講嘢冇用。之不過,呢啲嘢點解唔喺屋企做呢?聽現場有咩好處先?可以搵助教?經驗最豐富嘅老師,可以短時間內知道學生問題,再因材施教。呢啲先至叫教學。如果每堂播錄音帶,咁我要個老師做乜呢?

學生需要嘅係可以引導佢哋,定期評核佢哋進度嘅老師,而唔係單純提供單向教材嘅機構。所以我哋堅持一件事:淨係做小班教學。小班教學我哋先會清楚每個學生邊一方面要改善。好多時要改善嘅問題係有理可循嘅。根據返我哋講嘅 80/20 原則,透過老師評估同專業判斷,向學生指出最關鍵 20% 嘅弱點,就可以解決到 80% 溝通上嘅問題。肯定有用過叫學生畀錢睇電視。

全文 865 字 (唔計英文、空格、標點)