《玩 Pokemon Go 投入烏托邦既世界》

我成日覺得如果一個討論只係為鬧而鬧係無咩意義。或者如果我地更細心地去研究寵物小精靈既世界觀，我地可以從中得到更多既啟示。
　
例如，寵物小精靈同人類可以和平相處，戰爭似乎絕少有所提及，亦都唔會因為唔同既派系而出現好似敍利亞既移民問題甚至恐怖襲擊。世界享有高科技，每一處地方都青山綠水，不論係大人同小朋友似乎都可以開心地生活，甚至唔愁衣食問題去捉小精靈並且從事相關既事業同埋研究工作。我地絕少了解到寵物小精靈既世界入面既政治經濟同埋金融制度，有無失業率或者犯罪比率等等。即使係大反派例如經常出現既火箭兵團，亦似乎不斷失敗，而且所謂既行惡事同現實世界所作所為完全無辦法相比。
　　
如果搵另外一套主角永遠都唔會長大亦都充滿住幻想既名作叮噹黎比較。好明顯大雄既痛苦，應該比小智來得多。不但止經常要俾人欺負，心儀既女仔又成日俾情敵叫左去第度做功課，而且又要面對老師既鞭策，老母既訓斥。甚至有叮噹呢個如同已經係開晒金手指既好朋友，因為佢既愚蠢同無能，件事往往只係向住更惡劣既方向發展。小智唔係無遇到困難，但佢既路只需要成為最佳訓練員，世事種種壓力同佢無關係。
　
換句話說，呢個係一個近乎烏托邦既世界，亦都有少少似金庸既武俠小說世界。或者近貼近Ｄ講，一向兒童睇既動畫世界，往往都強調友情、愛同埋正義。經常都標榜只要有夢想，並且努力去貫徹呢幾條信條，奇跡就會出現。如果再調番轉頭用大人克人憎並且撩交打既帽子去睇，呢種想法只係左膠（即只係鼓吹和平大愛）。因為現實世界，根本上就唔係咁運作。呢個世界既操作，其實比想像中更加黑暗。所以真實世界同動畫世界一拍埋，變得極之咁諷刺。
　
但係我地始終唔可以否定人始終都係軟弱既動物。雖然世界係如此地崩壞，我地始終希望有一片可以俾自己釋放既園地，比如話「回歸童真」、「重拾自然」。中國古代文人所筆下既桃花源，又何嘗唔係西方烏托邦既另一種表現？邊個唔想世界和平？邊個唔想自給自足但係又無須為各項既資源分配而爭鬥？邊個唔想好似John Lennon 咁 and the world will be as one？所以其實Pokemon 受歡迎，以至依家再出遊戲大熱，可能都係同一個原因：
　
大家都只係想抖下氣。暫時（甚至永遠）逃離現實。如果我搵一份工，考一個試，甚至係將６８９轟落台，只係好似玩Pokemon Go 咁拋個波出去就得，你話幾好。波又可以不斷無限任添，而呢度搵唔到小精靈，第二個地方亦總會有。總之你付出時間同一Ｄ腳骨力，就會得到回報。其實人類渴望既，往往都係咁簡單。郭靖係個白痴，但偏偏就係佢練成降龍十八掌。金庸筆下所有人物，幾乎都唔駛煩兩餐，總之費盡心力打打打。一樣道理。
　
但點解呢個世界會變得咁複雜？點解人類幾千年黎都要不斷從幻想同現實之間不斷來回奔走去折磨自己？呢個唔會係呢篇文答到既野。我只能夠講，或者將一個地方幾熱衷Pokemon Go，同佢對個地方本身現伏有幾不滿，去做下統計研究，或者會有發現。不過呢Ｄ野留番俾Financial Times 或者Economist，我就按下不表。
　
Btw，不嬲都有人講文學藝術既野，亦不過精神鴉片唶。