《唔得啦，真係要減肥今次～》

岩岩一支公食飯。

本來無咩打算偷聽隔離講咩。但就突然有把嬌滴滴女仔聲話：

「唉，你睇，我幾肥呀～」
「唔得啦，真係要減肥今次～」
「唔知點減～有無計呀～唉～～」

既然講到世界末日咁，又即管睇過。於是我好不經意咁樣拎轉面睄左一睄，然後，繼續低頭，若無其事地食飯，過程相信不花貴多於三秒。結果，毫不驚喜地，我見到既只係：
兩個面容好普通既香港女仔，應該廿零鬆Ｄ歲咁上下。佢地兩個有個共通點，就係：一個瘦過藤，一個瘦過條柴。簡單目測，可能係三圍25-25-25平面電視Ｄ ＦＲＩＥＮＤ。
唔知點解，扒左啖飯係口趙果陣，我突然又諗起另一個經典笑話：

求學時期，係一班學生入面，往往考完試都有幾條友一出試場，即刻扮晒蟹咁大叫：炒晒啦，完全唔識呀！過程不乏呼天搶地，甚至幾乎即席要係操場割脈既情節。但到最後，其實佢地就係最高分果幾個。老老實實，講呢Ｄ既人，都唔無理過真。有苦自己知既果班人，講得太多，真係會折壽架～～

最近高登老納有一句「俾錢睇樂視，同睇港女除衫一樣，都係無波」，可謂戳中痛處，即刻備受萬千網民瘋傳。坦白講，成日都話港女質素低絕中台日韓，一方面當然係隔離飯香啦，但另一方面就真係唔好係又減，唔係又減啦。身材輸蝕，除左運動量，日常飲食習慣亦大有關係。太瘦，真係攬起上黎會插穿兩側肺葉架。你會突然之間做左男朋友殺人兇手架。唔係講笑架。好恐怖架。

在此奉勸各位視減肥至零為終生不朽事業既諸位，量力而為，切忌走火入魔。及早回頭是岸，收手啦。善哉善哉。