《點樣回覆來函，可以得罪全世界？》

網上依家成日都會見到好多公文、聲明甚麼的，飛黎飛去。但係唔知係咪覺得係網上出，就代表可以輕率了事，暫時我玩ＦＢ兩個月所見，當中既垃圾，真係多過堆填區。

以自己或者團體名義寫一封信，係舊時（唔好講古時一陣又話泥古又盛）係茲事體大，因為寫既野係代表自己既名聲，寫時要講究唔好得失對方，絕不能馬虎，敷衍了事。要文情兼備，或者係今時今日，已經要求太多，但大方得體，合乎禮數，係最起碼。當然你話喂依家仲講呢Ｄ？尊重？禮數？食得架？ＯＵＴ啦喎，咁你可以直飛本文。但我估，有時會唔會引爆關公災難，其中一個情況，就係睇呢Ｄ。

舉例，我最近見到某政黨出一封信，內容係咁：
「九龍東區選民
牛肉麵先生：
來函已悉。ＨＫＣＪ將不會出席於六月廿一日Channel-I 直播節目參與論壇。
在此先感謝相關媒體之邀請。
　　祝
工作順利
ＨＫＣＪ秘書處謹啟
二零一六年六月一日」

要睇封回信有咩問題，首先，我地要睇番來信究竟寫左咩。
「ＨＫＣＪ秘書處ＷＮＧ先生大鑒：
　　頃閱網上資訊，得悉高登名人『ＭＤＳＫ』ＣＳＴ先生欲與貴黨一眾才俊（略）公開論政，今特函奉達，誠邀　貴黨賢達回應。
　　Ｃ先生雖與　貴黨政見上有所相左，但所謂『真理愈辯愈明』，若　貴黨能應邀出席辯論，或可辯清真理，不失為政壇一大美事！再者，素聞　貴黨有意參與九月立法會選舉，本人認為　貴黨應把握一切論述立場之機會，不宜推辭，以論壇之機接觸更多選民，推廣民主理念，方為深耕細作之道。隨函隨上有關連結。
耑此　專此候覆。
參考連結：(略)
　　恭請
鈞安
九龍東選區選民牛肉麵　謹啟」

呢個直頭係典型既舊時中文實用作文ＡＬＥＶＥＬ題目！依家你作為秘書長，正要修書一封，回覆牛肉麵，婉拒來意。要留意，來信雖然略嫌冗長，而且部份用字有少許問題，值得商榷，但係有依足禮數，敬語不絕，可見其努力同誠懇，以普通市民，如此出信，難能可貴，身為新晉政黨，理應重視，不應怠慢。但係睇番回信，就算不拘泥何等格式才算正確，亦會見到以下幾大問題：

（１）牛肉麵係先生定係女士？點解秘書處會知道一定係先生？輕視抬頭人，胡亂捉用神，隨時中箭，大忌。
（２）來信指名收信人（ＷＮＧ先生），但回信竟然變左係秘書處。令人覺得政黨有高高在上既姿態，不佳。如果要做得小心，不招人話柄，就算唔係自己親自修書，起碼都用自己抬頭出番，咁先合乎禮數。
（３）回信毫無敬語，亦忽略行公文既一般禮數，白費來信人一番苦心，毫不禮貌。
（４）舉例，人地稱呼　貴黨，仲用抬頭格，自己應該要自稱敝黨，以示謙遜。
（５）由例如，人地以大鑒起首，敬意非常。但係回信亦完全將之無視。其他例子不勝枚舉。
（６）來信已經講明「不宜推辭」，而且有道明立場。但係回信無合理原因下，一口拒絕。做法令人驚訝！
（７）祝福語竟用「工作順利」，無考慮過來者何人，究竟有否職業（對方可能係家庭主婦，學生之類），胡亂填寫了事，毫無誠意。

我係來信人，睇到咁既回覆，係會感到異常憤怒，覺得自己意思完全被漠視，而且對方似乎日理萬機，又唔能夠自己覆，只係交俾秘書處，秘書處邊個又唔知，匆匆幾句就算，衰過政府，明顯不聽網路民意，對之嗤之以鼻。唔好講日常生活，係公開試，咁樣既水平，加上各種如果要渣正黎做既格式上失分，又係一個不合格既最佳例子。

篇幅所限，我就唔再擬應該如何回覆，才屬對版。大家想必知道，只要花十分鐘ＧＯＯＧＬＥ，範例隨處可見，咩時候用咩ＴＥＲＭ，全部都有得抄。呢件事只係證明，對方根本完全唔放牛肉麵呢種意見在眼內。如此政黨，功夫做得如此粗陋，仲想妄想得到支持，入議會代表市民？如果成事，又是香港玩完另一明證。燈塔在此，只能夠表示十分可惜。

（編按：為免開真名，作者杜撰英文字母代替。「ＨＫＣＪ」的確係指一個香港新成立嘅政黨，唔係馬會。）

------
後記：編輯咁啱見到作者臉書有以下一段文字，疑同上文有關，順便收錄：

真係好唔想 ＯＴ，結果都係係個ＷＯＲＤ到撩左幾句野：

「敬覆：　欣接　大函，謝甚！誠蒙　台端之邀，深感榮幸，亦覺不勝惶恐。惜在下近期，公務纏身，恐未能赴約，還請亮察。如他日再有如此盛會，敝黨上下，必定盡量抽空，恭聽諸位文士高論，指點一二，實乃敝黨之福。耑此奉覆。即請　夏祺　ＧＰ。」