《我地首先要明白既係，語言係真係會死的》

我諗我都講左好多次：點解我可以寫書面語都棄而不用，而揀用廣東話口語入文？一方面自然係我學養差，文筆廢我認，另一方面，因為粵語擺到明勢弱。廣東省可以支持幾耐？唔知。就係香港七百萬人都有可能有過百萬人唔再係廣東話母語，你唔驚？我地下一代仲要用蝗語教中文。你唔驚？

個人意見：我完全唔覺得咁做可以動搖到全球中文書寫系統，依家只係驚五十年後無人知咩係蕃茄，咩係車厘子呀。呢個係一個猶如錄音既記錄，一粒受保護既種子。救得一粒係一粒。如果文化唔係會被任意踐踏淘汰，駛咩多此一舉？

依家個政治環境係，我係學紅樓三國，方言入文即刻俾先生剷起呀。仲講會影響華夏復興，睇到自己咁高可以反攻番十三四億人就發達啦。

我地首先要明白既係，語言係真係會死的。本來如果你有一堆人不斷講，講完又教俾下一代，一個語言，就唔會死。但係語言點解會變成方言，就係因為方言不是主流。至於甚麼才是主流？政治取態，就足夠影響咩為之主流。為左統一，為左方便，為左甚麼傳播之餘此類，一個政權，係可以用一個絕對既辦法，令到一個方言死亡。

極端既做法，可以殺晒所有講方言既所有人。又或者，迫佢地，唔准佢地講，然後將一切有關方言既典籍，全部銷毀。只要能夠循序漸進地做，一樣就可以將方言慢慢咁淘汰。果陣上堂，教過一句最重要既野，就係語言，會流動既。語言本身有生命，在於人賦予佢生命力。如果無人用既字，或者詞，就會死。隔左兩三代，如果無其他記錄，就此絕跡於世。

我係度舉一個例：嘩叫親你做野你都係側側膊！

你上堂有無人教過你咩係側側膊？相信無。甚至屋企人都無教過，但點解你會 get 到側側膊就係唔多覺既意思？就係因為口耳相傳，有人講，有人知道係某個場合，用呢個 term 就係適合，所以你就久而久之識用。但假如去到有一日，無人再講，只會用口語話：你咁樣不負責任喎。甚至係蝗話：你這輕骨頭的夯貨。咁點算？以上既情況，絕對可能發生。

另一個例：你呢個真係天津沙梨。

呢個係比較年紀大既人先會知既廣東話歇後語，其實係指你咬極都唔入。另一個意思就可以話你係石頭，點鑽都鑽唔出血。如果你本身無聽過，你會知道我講咩嗎？如果呢Ｄ野都係廣東話裡面有價值，值得紀錄既野，點解唔可以寫低？點解唔可以保留？之所以要筆錄口語咁反智，就係因為有一堆人已經 assume 左最壞打算，我寫既第一段會發生。

舊時，統一書同文字，又或者其他原因，會焚書坑儒。依家有網上，會好Ｄ，但仍然係一個吃力不討好既工作。第一，被主流中文既高雅之士排斥，因為佢地嚴守所謂文言，白話之正統；第二，廣東話研究學者良莠不齊，一Ｄ不斷花精力研究正字，但忽略口語最後讀音成句重要於書寫成字；第三，政治壓力，不斷將方言困入死角。

我只係想令到我既下一代，係有能力講到廣東話，寫得到書面語，亦都可以好似我地咁口語寫野亦得。呢個其實只係十年八年前既 status quo，一個微小既願望。我相信做粵典班人，大概未致於瘋狂到想奪取整套中文書寫既正統。因為根本就係無可能。

依家你當然會覺得將「有朋自遠方來，不亦樂乎」講成「有朋友係遠方黎，真係好開心架！」係 trivial ，係低能，係垃圾。因為廣東話仲係一樣無 cost，人人皆知既 free goods。但環境係會變的。等於你問下沙漠既人，咩先係最可貴？係水，同駱駝。當然係香港，你會話有匹駱駝係垃圾既。觀點與角度囉。
圍爐，真係無錯，今鋪真係圍爐，但呢班人，係閂晒窗係零下三十度圍一個只出一氧化碳而就黎熄滅既爐。我真係睇唔到任何要再將之趕絕的理由。請恕小人不識大體，不識學術，不識政治。我講既係咁多。

利申：呢Ｄ全部都係我既個人意見。我當然唔代表粵典等人取態。

------------
（編按：粵典總編輯擇言有參與《香港語文──聽陳蕾士的秘密》，我哋係兩個理念相近嘅團隊）