(beta 公測版本)
< 返回

《上一代有一個致命既缺點: 做錯事,唔識認錯》

日期:2016年5月31日

[對號入座]

上一代總喜歡笑年輕一代無勇無謀,做事唔夠圓滑,不通人情世故,只懂得橫衝直撞。但到自己觀察世事,亦發覺得上一代有一個致命既缺點:
做錯事,唔識認錯。

時代不斷改變,過往既觀念會被改寫。無辦法認清當前現實既人,就會因為抱擁住過於陳舊既觀念,變成一種偏執既迷信。

係呢度講番一件小事,零八零九年,我地M群財經台一班炒友,就提出要恆指大跌,必然要做淡重磅股;而要做淡重磅股,金融海嘯重災區大笨象匯豐,係不可能不在被大沽空之列。我地一早話穿一百蚊,係遲早既事,而且一穿,就係無底深潭,有排都不得翻身。記得果陣係高登,俾人鬧到狗血淋頭,但結果,日日睇血肉長城,穿完一個十蚊又一個十蚊,一邊係Office飲住Latte一邊食花生,一直去到三十二蚊青姐落淚既經典場口,果下先係M群其中一個代表作。

放大雙眼睇清楚過往被譽為「退休股」、「穩陣長渣股」、「剩係收息都印印腳」,金融海嘯暴跌後,到依家差唔多八年幾九年,有咩表現?果D手持過百萬股票以上既阿伯阿太,唔知有無後悔?話無,就係假(係當然有D幾十蚊揸起仲可以講我無蝕)。唔好講匯豐,就算係渣打,強國四大行,依家通通出事,如果唔計息個年均回報我都唔知Beat唔Beat到Inflation。Anyway,其實以上都係一個比喻:平反六四,亦都係一樣道理。

道理好簡單,有一群人一度天真以為,只要我地呢度能夠死守,然後傳承住所謂既民主之火,就可以足夠將呢種思想,傳上上面,甚至可以因此建構一個全國民主社會。到時就可以伸張到當年學生既正義,就可以將佢地既冤情徹底地昭雪。所以個晚會先顯得咁重要。但當中牽涉到一個重要既前設就係:人地係咪真係俾你潛移默化到,至得架。

去到二零一九年,就係足足三十年了。如果你用足足三十年,都無法點化一個人,你仲點樣叫其他人去信,去將呢個做法,繼續堅持落去。你無辦法唔能夠叫新一代徹底失望,絕望,因為時間已經證明,呢個方法係完全唔Work。的確係可以每一個人透過呢件事去認識;去悼念,但講咩愛國建設大民主中華,就係痴人說夢了。依家唔係反攻唔反攻既問題,係我地既民主之火都已經奄奄一息。

年紀大左,自然要面。錯左,總不能隨便認。啞子吃黃蓮,說不出的苦,但都只能死撐下去。無錯,信的繼續相信吧,要去集會也儘管去吧。就等於日日擔天望地睇住股票機有堆人,死鍊住一堆內銀股,口中念念有詞:深港通快開了,總有希望的。會爆升的。

全文 833 字 (唔計英文、空格、標點)