《講文學藝術，我會有自己既一套標準》

講文學藝術，我會有自己既一套標準。

當中，作者首先自己要對成件事有深刻既理解同埋認識，透過學習，而去熟習果種技藝。然後佢開始去構思一件接近完美，或者佢心目中暫時既完美，既作品。

作品既內容可以係任何野，但係想表達一種自己既思想，希望能夠成為經典，吸引到既唔係一時觀眾既短暫目光，而係產生共鳴之餘，對呢個社會產生一種強烈既變化，而呢種變化，係足以留存萬世。藝術到最後，通常都係想表達幾個最偉大既中心思想，歌頌天地，歌頌神祇，表達世界既真善同美，或者對人性作出深刻既表現同反思。一件藝術作品，係為左一個重要既思想而做。我甚至覺得，作者係要希望有左呢件作品之後，世界會被呢件作品所推動，變得進步。

單從呢方面，不論文學音樂繪畫，全部都係一樣。因為係咁複雜既一個表達手法，所以要被稱呼為文學，有佢既複雜性同象徵意義，透過高超既技法做出。然後旁人仲要識得細心欣賞，再分析，賞析，每次皆有所得。任何藝術，韻味皆極其深長。

流行文學，對於我黎講，流行同文學應該分開。流行，係指popular，受人擁戴。受人擁戴與否，係睇果陣既人鍾意咩。呢個決定性因素，不是文學既質量，而係市場學，經濟學。一段文字，可以極為流行，但不能夠稱呼為文學。但某程度上，文學不能當飯吃。因為書局要賣書，要賺錢，所有近代既文字作品，亦都會稱之為流行文學，我覺得係一種手段，去抬高佢地既身價。流行，再加一種有時間性既意義。但其實，應該只有古代作品同現代作品。文學還文學，流行還流行。

作品可以成書，可以大賣，但不代表就係文學。我自己寫故上高登，有人鍾意，有人出版成書，但自己都會同自己講，我寫既唔係文學。一堆半夜三更係接近零雕琢情況下草草而成既文字，不可能係文學，當中表達既概念直接，只係單純地說故事。除非真係由頭寫過晒，否則文學既成份一定十分之低。至少，我本來就無打算過，將個故事可以推到去一個高度。有人自稱為高登文學既，可謂十分狂妄自大。

所以寫作既人，完全真係睇下佢想追求既，係Ｄ咩。例如一個畫家，佢可以畫一世都畫同一幅畫，十年磨一劍，表達出佢既一切。呢幅畫足可流傳後世既話，就係不世藝術。但可能佢生前都唔會有人欣賞，甚至死後都無，當垃圾處理。佢可以唔畫呢種畫，改畫漫畫，可能會因為一炮而紅。漫畫一樣都可以有藝術成份，一樣都可以有流傳後世既一日，但中間有幾多係咁（即所為流行中的藝術元素）？定還是只係單以讀者愛惡出發？我相信好多都係後者。

所以我話你係死守派。因為你仍然Value 我一開始講果頭幾段。我就覺得繼續係茫茫人海中尋找僅餘知音，太困難。我不執著，不強求。世道混亂，我但求得過且過就算。