(beta 公測版本)
< 返回

《一個廁所出賣你嘅人格》

日期:2016年5月2日

[我真係好鍾意用好認真既語調講ON9野。。。]

[下文有驚嚇情節,請避免食飯時間觀看,多謝合作~]

有人話,打牌會知道人品。

計我話,去廁所,先會真正知道果條友有無品。

人花三分一時間係訓覺,去廁所既時間,相比之下,一定少好多。之但係,唔好睇少果短短幾分鐘或者一兩個字。去一個優質既廁格,解決人生大事,不單係大腸、前列腺健康尤關既頭等大事,甚至會影響一整日既心情以致工作生產力。試諗下如果一個國家元首去得唔暢快,可以有咩效果?一場戰爭,可能就此發生。所牽涉既,會係數以百萬計既人命!

而一個廁所,亦都係正正反映著一個民族既優勝劣敗。廁所係最私人最隱密既地方。你可以係果度,大門一閂,就為所欲為。所有平時既道德教條,公民教育,都可以拋諸腦後。佢係一面照妖鏡,可以將一個人既惡行,完完全全揭露得無比徹底,而無須負上任何責任。所有既野,都會由偉大既清潔工友,同埋下一個去廁所既幸運兒承擔。所以,一個人可以有幾衰,去一去廁所,一定無所遁形,IP都唔駛Check!

所以,當好多人都話強國人超無公德心之餘,我成日都覺得,香港係呢方面,只不過係五十步笑百步。點解?就唔好講大型商場既廁所,會有遊客既存在啦。我地不如就係呢度,就講就散,講下公司辦公室既廁所。尤其是當你以為,辦公室入面好多高教育水平人士,點知原來連去一個廁所都唔識去,你就知道,呢個世界,衣冠禽獸係有幾多。

成地都係,個廁板濕晒,或者個馬桶無沖廁,只不過係小兒科。我就係呢度拋磚引_,分享一個我曾經見過最離譜既例子:

試過一入去廁格果陣,部格仔牆一片一大撻咖哩朱古力喇沙,杰杰地,好似就死既鹽蛇,想抵抗地心吸力又抵抗唔到咁,慢慢蜿蜒而下。一直去到 D 磚罅,先減速然後作冰掛狀呀。個廁所仲要好臭,好似坑渠爆左十隻死老鼠再穢土轉生,係你個鼻度出出入入呀。我真係好想知道佢個人個出口係咪花灑狀,又採取左個咩世界級既姿勢,先可以痾成咁。

大家仲係香港見識過咩最核突既廁所?唔好食飯住啦。即上輔仁Facebook 分享左先啦![bang]

#輔仁適用 #粵典適用 #多謝牛牛御准 #勞動階級萬歲

全文 730 字 (唔計英文、空格、標點)