(beta 公測版本)
< 返回

《如果果陣有Whatsapp,或者我地就唔會分手》

日期:2015年10月8日

我見神牛又講自己既愛的羅曼史,我身痕又寫一單先。

話說依家手機上網咁方便,又咁多通訊App,結果人與人之間反而唔係親近左而係疏遠左,隨時因為各自各玩Whatsapp同其他異性朋友Flirt下又出事,結果分手收場,甚至分手都係用Whtaspp留個言算數。Whatsapp成為分手元兇,依家真係好流行,但小弟讀緊書果陣,咩差都無,聯絡唔到,反而先係感情既死忌。

話說果陣同個女仔拍拖,拍拖果陣老豆姓咩都唔記得,剩係覺得佢好pure 好ture,就算有少少港女脾氣成日痴身,都覺得好易接受,同埋梗係會安慰自己「佢咁樣都係愛我既表現啫」,所以當然係百般遷就亦樂在其中。本來一直都無問題,直到佢有年佢去Exchange,出事喇。

話說有次佢係美國唔知遇到槍擊定咩,驚到佢痴線,但係咁岩佢想打電話俾我,尋求一D安慰,叫佢冷靜D唔好驚,佢又搵我唔到。

果陣時,無Facebook,無Whatsapp,仲得個Xanga,想Instant Messaging?開Icq或者Msn啦!亦都無Wifi,換句話說,你去左上堂,無電腦係手,咩都唔駛傾,加上時差關係,電話岩岩唔係好收到,完全係無符。事後知道,我已經知道自己犯左彌天大錯,Say sorry,補鑊,通通無用。

神牛就話佢個Friend就中出即飛左佢本來鍾意既女神,而我,就係無情白事一單飛來橫禍之後,佢Exchange完返黎就飛左我。係無疾而終地宣布死刑果隻。慘到我第個Sem 即刻GPA插晒水。

後來聽Friend搭Friend再搭Friend 先知,佢係Exchange果陣識左個男仔,而個男仔又咁岩係危難之際係度,結果就一拍即合。我就咁Rest in piece。依家諗番起,都係有少少唏噓,其實當然無如果,而且拍落都知性格不合,分開都係遲早既事……但係如果,果陣真係有facebook、有whatsapp,又live feed又盛,即刻msg又好live video chat又好補一補鑊,唔知歷史又會改寫成點呢?

所以大家有時都要珍惜果下「我一要搵到就搵到你」既機會。係好濫,好煩,但係呢個係一個古人舊時想求都不能求到既神仙技倆。飛鴿傳書再快,都要一年半載,依家你想講句I love you,你諗下幾容易?問題只係,你仲有無咁既心咁解。

祝大家有個愉快既週末。

全文 638 字 (唔計英文、空格、標點)