《五分鐘寫粵謳》

[偽文學拎] 其實有時我係度諗，與其仲停留係度拗咩廣東話比普通話更加配合讀詩，留於理論層面，講到D野又錯Ｑ晒，混淆視聽，不如實際一Ｄ，直頭教用廣東話入詩。

係，你無睇錯，呢種詩，或者可稱呼叫做「粵謳」(好似係)。

「粵謳」，同寫所有詩一樣，如果要隨便一Ｄ，可以當古詩，咩平仄唔理；但如果想嚴謹些少，我地可以跟番個近體詩格律。不過係押韻方面，我都會主張放鬆個用韻規則，只要依家聽落係押韻，就可以接受。

換句話說，咁樣做，可以連一般要學詩一定要有既「平水韻書」，都可以丟埋落垃圾桶，唔駛再受咩「一東二冬」煩膠所束縛（唔好咁泥古呀嘛！）。只要知道廣東話九聲，甚至只需簡單分辦平仄，就可以嘗試開始寫。

我地以最簡單既七絕為例，首句平起，用韻，格律為：

平平仄仄仄平平（※）
仄仄平平仄仄平（※）
仄仄平平平仄仄
平平仄仄仄平平（※）
※平聲韻

就咁求其地無厘頭頹作既話，當自己係小朋友，都可以亂咁填黎玩下：

今朝點火煮雲吞，
晏晝燒柴睇輔仁。
自己推文推得快，
狂吹喪讚有威能。

利申：以上詩只用左約五分鐘，所以千祈唔好鬧我詞不達意，平仄唔岩。呢個只係一個粗淺既示範，證明廣東話去寫詩，一樣可能。咁唔係好過癮咩？用廣東話入詩，一方面生動有趣，又可以保留粵語精神，好似填詞一樣，應該幾好玩，又有教育意義，小朋友與其去學排Ｄ詩既前後次序咁無趣，不如直接學下寫。玩熟左個格律之後，再真正將古字入詩，打好文學根底，可謂一舉數得。

#輔仁適用