(beta 公測版本)
< 返回

《有種奢侈品叫做暑假》

日期:2016年4月25日

出黎做野先知道,原來有一種無論用幾錢都買唔到既奢侈品,或非賣品,叫做暑假。

初夏時份,藍天白雲,青山綠水,完Sem既校園,有一種和平既寧靜。雖然天氣係好熱:一旦係冷氣地方出黎,皮膚因為適應唔到,全身幾乎即出倒汗水咁滯,加上汗出如珠,衫肉相連,有一種異常既濕悶。唔再行快D,就會俾猛烈既太陽,刻毒既紫外線,成個好似粟一燒夾生咁燒熟。汽水機跌出黎既雀巢咖啡,雖然話就話係凍既,但係高溫下會迅速變暖,有時杯頂,甚至會冒出白煙。。。

熱到想死,熱到想即刻返屋企,熱到想係咁沖涼。但即使如此,暑假最好既地方,仍然係,時間係無可比擬地寬裕、充足。

頹考完個試,匆匆完左個Sem,無拖拍,或者岩岩散左,自己劈埋一二面發霉發臭,要生要死左十零二十次,改左ICQ Status 廿次都無人理,Winamp個失戀Playlist 終於都loop到爛左之後,都只不過係過左十零日。無錢去旅行,就死死地氣,碌去Library做份Student Helper,以低賤既價錢,整下網頁,排下書,監下場,清下printer既jam紙,甘心做一個廉價既勞工,換取有閒暇得黎、又有 D 錢搵、又有 D 細藝,而唔會完全流於廢青既暑假。

我同我班同事Friend與其話做野,不如話係Hea仲黎得貼切,反正 D 野執極都未執得晒,尤其是館藏果 D 野要搞係無止境,大家每日都係整果少少,老細亦唔會吹你,因為佢自己都唔想搞。於是細細聲廢吹一輪,等到兩點半時間,小步過去一間Café食下午茶。果時候一大碗五香肉丁烏冬,加奶醬多士,仲有野飲,凍飲不加錢,都係不過廿鬆D蚊。

一邊食,一邊睇下電視,或者周圍望下,有無上summer course 既標緻exchange student,如鬼妹架妹,都係大家賣飛佛(果陣無咩內地生,亦未興泡菜)。真係無,先聽下蟬鳴,望下山景,發下吽哣,然後再施施然返去。無智能電話,無Whatsapp,無Facebook(頂多都係玩下貪食蛇),大家樂得自在,傾下偈,享受真正既清閒。依家?今朝六點半起身,衝返Office,無停過咁覆E-mail,draft野。。。直至依家,我都唔係太知自己係度做咩。

如果發明時光機,我當然唔會返大學時期咁蠢。我會直接返去叫發明E-mail條友收皮,唔好搞咁多野。

話唔定大家仲可以準時五點半放工。

‪#‎輔仁適用‬

全文 685 字 (唔計英文、空格、標點)