《全職獵人教識我嘅人生道理》

全職獵人Hunter X Hunter 連載再開，立即炒熱話題。

有人已經為作者富樫，（下稱富奸）幾時再背痛或者打機休刊而開盤；亦有人就最近畫風突然極度精細優美，再度質疑富奸係咪又開外掛，即啟動超級大後備，由繪畫美少女戰士既武內直子老師（佢老婆！）作為助手。

不論結果如何，大家由童年追到中年，甚至步入緊晚年，自然不心存奢望。作為全職獵人燒書隊第一分隊既永遠名譽燒書隊總參謀長既我，只有幾句講，就係：

單從全職獵人呢套野，你唔好理佢講咩，已經有好多人生道理係入面。

（１）你懶到仆街唔緊要。你最緊要係天才。天才既話，就無視一切法則。大家都係爆漫中知道少年Jump有不少陰暗面，唔掂既連載就即刻會剷。但係富奸斷下寫下，寫下斷下，一樣係少年Jump有神級地位，無人夠膽斬佢。依家就算開波既劇情線已經係年幾前，無人記得，佢一樣照去，無人能阻。

（２）你最緊要有人支持。無人支持就係乞嚏，記住。基本上觀乎呢兩個禮拜開新刊，雖然個個都話「無人講過我想睇落去囉」／「睇下佢幾時又休刊囉哼」～但係身體好誠實。今個星期鏡頭無厘頭轉左去天空塔頂，變態佬希索加竟然會同幻影旅團團長做死決，咪個個即刻話正？D人一邊鬧，其實都係傲嬌病發作。如果你問要斬Jump邊篇先，佢地一定毫不猶豫地答死神。

（３）爛尾並唔一定係一個問題。有時爛尾甚至係一個專登做成既結果。即係Too big to fail。例如香港既高鐵，又例如Hunter入面既世界觀，打到死死下個蟻篇，點知原來仲有個暗黑大陸，即係好似Internet 入面既Dark web，前者只係後者既幾百份之一。當你面對問題，無Solution，唔緊要，將問題Set到有咁大得咁大，搵多 D 人同你一齊攬炒。好多時群眾都上晒車，只得繼續同你癲落去。

（４）唔知由幾時開始，大家與其話係討論劇情，不如話Focus已經轉左去講究竟Hunter既休刊數同埋休刊時間，同埋富奸究竟仲可以仆街到幾時。佢慢慢已經成為你人生一部份，似你一個好似老闆既物體。你想同佢割裂，佢就係揮之不去；佢會不斷地騷擾你既生活；然之後仲唔俾你好過。換句話說，你做到神聖一樣存在，未必得到最好既效果。你賤賤地，甚至仆街，反而有時仲多人追隨（請勿對號入座）。

（５）最緊要娶到好老婆，咩都係假。但第一件事當然係……

所以你笑富奸，係咁日鬧夜鬧，其實你活左係佢陰影下。富奸有Game，有女，有天才，有錢，得閒又畫幾筆折磨你地，佢先係人生贏家。

#輔仁適用