(beta 公測版本)
< 返回

《明報搞成咁,好想知金庸而家點諗......》

日期:2016年4月20日

[既然係咁,反正都OT,寫幾句啦]

見到明報又爆一單醜聞,心有戚戚然。

可能真係人有番咁上下既年紀,覺得好多野,往往都真係跟足同一個過程,從誕生,發展,走向巔峰,盛世,然後衰敗,最終殞落。世事萬物盡皆如是。

明報係香港誕生於一九五九年五月二十日,換句話說,下個月既呢一日,就係明報立足於香港既第五十七個年頭。

開頭,據聞明報銷量唔好,原來既股東亦紛紛退股,只有依家人所共識既金庸,同埋佢既中學同學沈寶新,一直苦苦支撐。金庸既朋友,亦笑話明報唔會捱得到好耐。一邊萬里望,一邊倒數幾時執。

明報本來係小報,但係受到後來中共政局混亂,大量知識份子南下,令到一份求真、講公信力、絕對中立,以及有文化既報紙有市場,足夠明報去定位而立足。當然,明報做得起,除左時勢,亦都需要英雄,數其中之一既,就係金庸,憑佢既左手武俠小說,右手社會評論,寫到一紙風行,明報先唔駛關門大吉,並且有之後既一番事業。

講呢D,唔係要歌功頌德D佢地D咩野,只係讀歷史,永遠都有一份唏噓既感覺係入面。點解?

其實明報點解叫做明報?我上網搵左少少資料。應該無咩人知。至少我就唔知。[sosad]

金庸係未辦明報之前,係搞一份叫做野馬既小說雜誌。據聞,呢個係出自《莊子》《逍遙游》:「……鵬之徙于南冥也,水擊三千里,摶扶遙而上者九萬里,去以六月息者也。野馬也,塵埃也,生物之以息相吹也。」野馬者,取其很自由、有雲霧飄渺之意。係做野馬雜誌果陣,金庸搵左另外一個佢覺得文筆好好既人做編輯,而呢個人,叫做潘粵生,亦係文人,曾經做編劇。

文人辦事,最重名稱,因為向來名不正,則言不順。出師,亦要有名。到佢地想搞報紙既時候,就覺得再用野馬,好似怪怪地,所以就想諗過個名。當時,成報係一份相當成功既報紙,就是佢地亦都想一個字起名。潘粵生於是就提議叫明報,因為有明辨是非既意思。金庸亦同意,話明亦有聰明既意思。

不過係沈西城既著作入面,就有另一個講法,佢就話明報係解明理,亦都代表前程光明。明報依家用緊第一版既紅色大字,仲係專登請當時出名於影業既書法家,王植波出既手。Anyway,總之都係一個正直既名。坦白講,當時既人,如此既認真,對報章有如此既冀許,依家就搞成咁,尤如紅樓夢既賈府(或者回歸後既香港),毀於旦夕,點能夠唔令人歎息?好似話金庸當時,亦有問潘沈二人:

「會不會有人誤會左係明日黃花?」

接近一個甲子後既今日,查生你既擔心,應驗左。真係想搵人去訪問下佢見到自己既報紙,搞成咁,有咩感覺。作為一個仆街唔識字既後輩,我大概會話,除左恭喜真係唔知講咩好……

#輔仁適用 #預左認真post無人睇 #無睇明報n世

全文 903 字 (唔計英文、空格、標點)