(beta 公測版本)
< 返回

《有晚,我邂逅左一位女仔,我對佢一見鍾情》

日期:2016年4月12日

果晚,你問我:佢係咪靚到國色天香。
我答:唔係。
咁你再問:咁佢係咪身材好到玲瓏浮凸呀?
我笑答:亦唔係。
咁你睇到呢度,會嘩一聲,甚至屌出聲:咁點解你鍾意既,係佢?
係,個女仔,兩者皆否,但咁都吸引到我,呢D就叫做「特別」。

坦白講,係呢個大千世界,你要百嫵千媚,性感惹火,已經太多太多,尤如恆河沙數,買本HIM,或者去MenClub,甚至去ThisAV,用隻手指係個電話,一捽,以上種種,要圖有圖,要片有片,燕瘦環肥,要幾多有幾多。追到你追都軟埋,你都未追得晒。但見盡世間色相,有無發覺,其實個個差唔多?

但係呢個女仔俾我感覺唔同,好另類,即係Unique。佢亦唔屬於完全不食人間煙火,拒人於千里之外如同小龍女果Type。佢清麗可人之餘,係有一份活潑既靈性,蘊藏係佢雙眼入面。一種好純粹既無添加,足夠令人為之神奪。單望住佢充滿靈魂既雙眸,配上淺淺既一顰一笑,簡單既表情,真性情既流露,已令我無法忘懷。

再細心觀察多陣,佢身型高眺,皮膚白晢,清爽短髮,細細既劉海,五官恰如其份,無話邊個地方特別搶鏡,但就係整體感覺就係做到一份Harmony係入面。單以文青形容,好gfable,好pure好ture,係岩,但已略嫌太濫了。我甚至有一刻懷疑,佢可能根本唔係香港人。我無作進一步查證,但我奢望佢係。咁就更加順理成章,義無反顧地鍾意佢,高舉本土旗幟喇,唔駛單捧台日韓喇。[bang]

女神是離地的,高不可攀的,有一種要由下而上去供奉膜拜既一種神聖。但佢俾我既感覺係踏實的,入屋的,唔浮誇造作,亦不嘩眾取寵,有一份坦然自在既安定感。有一種說法,叫呢種係「空氣系」,形容貼切。空氣看不見,摸不著,雖然未致於誇到話無左佢,就要生要死。但係,佢既大頭一出現,我亦無法將自己既視線,係佢既笑臉中移開,一口清新空氣,在污濁既時代,難得。

鏡頭前面,可能因為初出茅廬,佢既表情有時會有少少生硬,但始終覺得,佢果種知性既氣質,得天獨厚,無得輸。再加一分既嬌羞,兩茶匙甜美,仲有D橙皮添(喂講得太遠啦),You got me。係,電視美女都有好多種,但係佢的話,立刻轉身,已經係我個場入左好多個三分波,點止反轉一分咁少?到頭來,人係應該反璞歸真。眾生如果已經太流於俗套,就極需要一株救贖既蓮花,去洗滌浮生。肉雖好,但太多就膩;清茶淡飯,帶點天然呆,歷久常新,亦清新可喜。

以我睇人既眼光,我相信,如果遇岩戲,遇岩節目,佢可以係一粒恆星,持續地發光發熱的。但識唔識得發揮佢既Potential,就睇佢間公司鳥。總之,一句到尾,如果佢再拍劇,我第一個追,唔駛講。

(下,你唔知佢係邊個,唔緊要,因為你仲未on99夠。得閒多D on99,話唔定會再見到佢架~~)

利申:已婚,我對佢既愛,只能下世再償還鳥~[sosad] [cry]

全文 884 字 (唔計英文、空格、標點)