《女人懷胎十月好偉大。 偉大係邊？個推論點嚟？》

咁講啦，通常我地話一個人偉大，係有兩個條件：

1. 佢犧牲咗自己一啲嘢，時間又好錢又好乜都好啦
2. 成就其他人嘅某啲嘢。

例如，耶穌被釘十架拯救世人（if true），咁耶穌就係偉大，因為犧牲自己去為咗赦免其他人嘅罪。再或者，我哋可以話抗爭義士好偉大，自己要被拉都甘願為香港付出。

講返，咁懷胎十月有幾偉大？女人係犧牲好大，青春甚至性命，好辛苦好危險，咁satisfy第一點「犧牲自己」。但係第2點「成就他人」，佢成就咗邊個？生個仔，成就咗啲咩？講到尾其實係自己想生，所以係成就自己，或者最多加埋老公。自己犧牲一啲嘢去成就自己，有幾偉大？Take risk唔係偉大，如果做一樣危險嘅事就係偉大，咁我無啦啦衝出馬路就係好偉大？我玩跳傘就係好偉大？Take完個risk，要成就其他人，先叫偉大。講返大肚，除非你話，為咗增加香港本土BB，要懷胎十月咁辛苦都生，就可以叫偉大（成就社會）。或者，網友Wiliyum Shi話延續族群，都可以叫偉大（成就人類）。但係單純自己想生，好辛苦好辛苦，生完，又無諗有咩貢獻比個humanity，我唔明個偉大嘅point喺邊。

咁之不過，如果生完出嚟，好好教個仔，就係偉大啦——付出自己時間心機，去成就個仔做一個好嘅人。咁點解啱啱一生，個仔一落地，唔算偉大？因為當時生仔一刻個仔仲未有自我意識，只係爸媽附屬嘅有機生命體，就算爸媽好愛錫好take care個B，又摸又錫咁，都唔係偉大。一定要加上佢日後好好教育培養個仔成人，願意付出而且唔係要求有對等回報，先叫偉大。如果要求有對等回報，你只不過係當個仔係投資工具，養兒防老唔偉大，因為唔係「犧牲自己，成就他人」。

結論，
懷胎十月唔一定偉大，
要養要教先偉大。

－－－－我是分隔線－－－－

所以，當有仔女覺得老母唔好，唔愛錫自己，其他人係唔應該搬出「你阿媽懷胎十月咁偉大生你出嚟，就算阿媽幾唔好，你都要報答返佢！」呢個論點。

－－－－我是另一條分隔線－－－－

有啲人可能會話，
咁生仔一定係延續族群，所以一定係成就humanity，所以by default係偉大㗎wor。
我地可以設想一個情況：
有個大肚婆，流克睇到佢肚內個B生出嚟得一年命，流克話比大肚婆知，大肚婆堅決生個B出嚟。即使呢個B唔會發揮延續族群嘅作用，又唔會造福人群，咁呢個大肚婆算唔算偉大？