關於我哋

簡介

《粵典》係一個大型嘅粵語辭典計劃。我哋會用Crowd-sourcing嘅方法，整一本大型、可持續發展嘅粵語辭典。

我哋嘅字典用香港粵語（廣東話）做中心，編寫解釋同例句都會考慮香港嘅用法；部份例句會由本土嘅文章抽出嚟，務求反映真實嘅語言現狀。

宗旨

我哋無意將《粵典》變成粵語嘅「權威」，亦明白一隻語言根本唔存在權威。所以我哋會以資料為依歸，用「描述主義(descriptivism)」嘅方法，盡力描述現今嘅語言狀況。呢個取態意味住，我哋會收錄各家流行嘅寫法、讀音、用法，入面會包含一啲公認為正確嘅用法，亦都會有新興嘅用法、比較小眾嘅用法。

整字典有咩用？

雖然過往有好多關於粵語嘅工具書，不過由於長期嘅「中文本位」觀念，呢啲工具書大多只係收錄粵語同中文唔同嘅部份，並冇將粵語視作一個完整語言去看待。我哋希望透過編寫《粵典》呢本「以粵釋粵」嘅辭典，可以打破呢種觀念，令大家會視粵語為一隻完整嘅語言，令我哋嘅語言同文字可以傳承落去。

開放資料

我哋希望 以開放資料(OpenData)嘅形式發佈資料。你日常用到嘅輸入法、語音辨識、機械翻譯，全部都要大量嘅語言資料先至整到出嚟，而粵語喺呢方面冇乜資源。今次呢個計劃除咗可以令到一般用家可以容易啲揾到粵語嘅材料，仲可以令開發者容易啲整多啲方便使用粵語嘅人嘅工具。