(beta 公測版本)
< 返回

《女人一生,只為尋覓一個肯為自己趕甴曱的男人》

作者:雞絲陳
日期:2015年4月18日

話說我本身就好驚啲會飛既野(唔好問我「咁飛機呢你驚唔驚」,我而家俾甴曱嚇親冇心情答你啲小學雞問題),即係包括:
 
.麻雀(我出街見到路面有麻雀我會避…會企喺度等佢地走…或者兜路行…)
.鴿(所以細個跟屋企人歐遊佢地帶我去嗰啲乜廣場餵鴿真係嚇死我,唔知做咩佢地餵得咁開心…我當時只覺四面受敵…)
.蝴蝶飛蛾蜻蜓烏蠅乜乜七七(呢啲又識飛又有殼又脆卜卜又牙籤腳對翼又薄又成既野真係好核突好得人驚…)
.其實飛埋黎既球類我都驚的(我細個上PE堂會避個波的…而嗰堂唔係玩緊閃避球…)
.不能盡錄(唔好再問「咁竹蜻蜓呢?咁飛機呢?咁飛天小女警呢?咁飛天少女豬事丁呢?」)
.好啦,蚊我唔驚的,我會竭盡所能擊殺佢地
 
又話說我住村屋,仲要住地下。之前住嗰度,屋前面有撻platform咁高左出黎既空地,有坑渠位(普通10幾cm闊政府整嗰啲);屋後面係一個小山坡,全部係雜草。咁就hihi喇,夏天真係好恐怖,極恐怖,超級恐怖。
 
有一晚,月黑風高…唔係殺蟲夜。係驚到PK夜。
 
我記得嗰個禮拜阿哥同細佬都唔喺香港,一個去左影pre-wedding,一個去左上course。我阿爸阿媽就好早訓既(或者係我太夜訓)。嗰晚,我已經唔記得係幾多點,總之就係全屋訓哂既時候(除左我之外得返兩個人咋嘛),我喺房見到一隻甴曱。係一隻甴曱。仲係會飛既。我真係好驚,好驚,同埋好很驚。阿爸阿媽又訓左,阿哥細佬唔喺屋企,我隻狗又闊佬懶理(佢真係好衰,事不關己己不勞心、諗住一世獨善其身既港豬就係呢啲喇)。咁我除左驚同埋好驚之外真係唔知可以點。
 
隻甴曱飛飛下好似安頓左落黎咁(其實係匿左喺我某個角落既舊書同筆記aka垃圾後面),我隔住啲舊書同筆記aka垃圾咁同佢對峙左一段時間(唔好問我幾耐,唔Q知,危急存亡之秋邊得閒計時,唔通記住咩02:58然後日日記念咩),見佢冇乜動靜,我就諗:好,為左可以安心訓覺,點都要隊冧佢。要豁出去漫遊…唔…搵唔到親友…唯有搵拖鞋,諗住拎完攻擊性武器就入房K.O.佢。
 
咁我就出廳啦,諗住搵拖鞋啦。
 
數到三,就開燈。
 
一開燈,聽到聲,望一望…嘩頂!我見到三隻!係三隻!係三隻(因為真係有三隻所以要講三次)甴曱!係曱甴!係甲由(因為有至少三種常用既寫法所以要寫三次)!!!喺我屋企隻港豬個糧兜!!!!!!!!!!!!係糧兜!!!!!!!!!!!!
 
平時啲麻雀衝關入屋偷食我屋企隻港豬啲糧,我已經好大愛包容。我忍。我都expect我隻港豬忍(咁俾人踩到上門仲搶你資源你都唔反抗,就係咁架啦,怨邊個)。但我真係誓估唔到連甴曱!係曱甴!係甲由!都想食我隻港豬啲糧!
 
最恐怖既!係明明個兜冇哂糧!佢地都要入去玩!咖啡杯定碰碰車咁氹氹轉喎!亦都因為個兜根本冇糧,所以我見到既畫面,就係一個銀色反光既兜!入面!有三隻啡色既甴曱!係曱甴!係甲由!
 
我嗰下嚇到喊左出黎。隻港豬仍然闊佬懶理。
 
既然佢自己都唔緊張自己既野,我係唔會為左佢而犧牲。於是我返返房,繼續驚——咁廳有三隻,房好似得一隻,咁好似返房安全少少。留喺廳既話,一陣糧兜入面嗰三種拍一拍翼飛俾我睇我咪大檸樂?!
 
返到房,抹抹眼淚,仍然驚魂未定。嗰一刻,我真係好掛住我阿哥同細佬。
 
如果佢地喺屋企,佢地一定會出黎救我。
 
其實我唔知阿哥驚唔驚甴曱(根本佢救我既次數就好少,我遇險嗰時佢通常都唔喺屋企既),但如果我求救,佢真係會出黎保護我的,幾時都係。除左因為俾蜜蜂針過所以佢對蜜蜂有陰影之外,我諗其他咩昆蟲呀蛇呀怪獸呀衰人呀佢全部都會幫我擋的。好鬼man。
 
至於我細佬,佢救過我好多次。而我都幾肯定,佢同我一樣好.驚.甴.曱。但佢都會淆住咁出黎救我,同我一齊喺間屋度跳黎跳去叫黎叫去咁追擊甴曱。又由於甴曱真係好醜惡,好醜惡,好醜惡。就算我有勇氣殺佢地,都冇勇氣收屍,所以細佬又要幫我執埋手尾。好鬼sweet。
 
講到呢度,探討返個現實少少既問題:一個好驚甴曱既港女,有幾大機會可以搵到一個唔驚甴曱既男人過人世?
 
係唔大。
 
機會係唔大,真係唔大。我識好多男性朋友都同我一樣好驚甴曱既。
 
我絕對唔會講埋啲咩「搞錯呀男人老狗驚甴曱」咁過份既說話,因為我認為甴曱真係好恐怖!好恐怖!!好恐怖!!!無論男女老幼高矮肥瘦都絕對絕對絕對有驚甴曱既權利。個男人如果可以勇武擊退所有甴曱咁當然好啦,可以食得招積住得舒適;但係如果個男人,好似我細佬咁,明明自己驚到爆炸,都出黎同你擋既,咁呢個男人…嫁得過。因為甴曱真係好恐怖好恐怖好恐怖。咁恐怖既野佢都肯出黎擋…佢應該真係好錫你…我會形容為錫你錫到一個近乎願意為你捨命既地步。
 
如果你男人係咁,請你一定要好好珍惜。
 
不過首先…………

全文 1549 字 (唔計英文、空格、標點)