(beta 公測版本)
< 返回

《點解六號咁多票?》

作者:婷欣娘娘
日期:2016年3月3日

果六萬幾票有一部分係游離票,有好多人已經解釋左,明就明唔明就算。但我好肯定嘅係選票一定無可能喺Facebook屌人老母屌出嚟,佢哋要繼續9up大家都管唔到,拗都無謂,不如講下點樣做實事爭多啲票好過。有兩類人嘅票喺我眼中係好重要,係屋企人,同埋啲唔係好留意政治但都尚叫願意聽人講嘅年輕人。

點解係屋企人?好簡單,因為拉票當然要先從最親嘅人入手。仲有好多個月嘅時間比你去做,請你由今日開始話食飯坐低就話比屋企人知,飯民有幾咁政棍、CCTVB點樣抹黑本土派、香港面對緊咩問題,你就係最可以拉到屋企人票嘅人。第二類人,係講緊啲唔太留意政治但今次都肯出嚟投票嘅年輕人,我諗大家拉票時都有留意到你果堆大中小同入面大把呢啲人。呢種票好游離,因為佢哋肯投多數都係「年輕人撐返年輕人」、「比個機會班新一代」、「唔鍾意班老屎忽」、「呢個候選人似係真心為香港」,但本土派嘅理念,我諗佢地大部分都唔係真係明白。

要說服呢兩類人,爭取佢地成為票源,首先你要明白一件事,對於佢哋嚟講,其實好多基本政治概念佢哋都無,點解要有民主?議會有無作用?而家主要嘅政治問題有啲咩? Who the fuck is陳雲?What the fuck is城邦論?大佬,佢地連呢啲問題都唔識答咖。

好多人講要推廣本土論述時都忽略左一樣野,其實香港大部分人根本無呢個基礎去聽得明你果堆論述。我見好多人話唔需要花時間去理呢班「無水平」嘅人,如果你有呢種諗法就請你唔好學人搞選舉工程,因為你絕對唔會夠票去入局玩呢個遊戲。現實啲講,得返半年時間,要拉票就必需要貼地,要行出自己嘅山頭,不能只活在自己嘅世界。對於老人家嚟講,前途自決、自治等等嘅嘢非常虛無飄渺,所以請直接話比佢哋聽支持本土有咩「著數」,而非糾纏於理論上嘅嘢。

「你想唔想你個孫唔洗同蝗爭學位?唔洗跨區返學?」
「呀媽我買唔起樓,年輕人需要本土派打擊地產霸權,增加公屋數量。」
「香港唔洗買東江水你都可以交少啲稅喎。」

而對於另外我講果班年輕人,請引導佢哋去吸收「正常嘅資訊」,見到佢哋喺Facebook 9Share果啲端啊、HK01啊,PM佢講一句:「喂你知唔知呢個媒體……」見到有分析得好嘅文章,咪得閒share去啲Whatsapp group。到選舉期間,請動之以情,厚面皮少少搵晒所有同你有交情嘅人,比啲誠意懇請佢哋聽你講幾句。但都係一樣,請唔好期望佢哋會聽得明你啲本土概念,咁姐係點拉票?我用例子嚟答你。

呢兩類人好多時只係靠直覺同印象去投票,唔會同你深究太多嘢,我用我呀媽做例子喇(如果佢有睇我Facebook就慘,成日比我擺上檯),佢原本同我講話要投方國珊咖。

我問佢點解:「佢話獨立,無黨,好啊。」
「咁你知唔知佢前幾年做過啲咩啊?」
「無留意喎。」不過好彩,最後都說服到佢投梁天琦。
我老豆仲衰,話見到有個人個look好似幾斯文就投咗。
「咁姐係幾號?咩名啊?」
「er…唉啊,唔記得咗。」

我男朋友同啲同事拉票果陣,佢啲同事都係話:「原來6號個樣毒毒哋,不過都算幾靚仔/型喎,投佢先。」

聽落覺得好搞笑?我話比你知啊,出面大把人都係咁。要拉夠票入局,就要遷就返佢哋睇嘢嘅角度。你覺得咁做好低能?唔想對住啲你口中果啲「無水平」嘅人嘥時間?咁我問你啊?有票,你真係唔要?咁大口氣,選唔到唔好喊啊喂。

全文 1088 字 (唔計英文、空格、標點)