(beta 公測版本)
< 返回

《雞絲教你玩fb:出咗柒post想收返點算好?》

作者:雞絲陳
日期:2015年8月24日

① Delete Post:係最戇鳩嘅做法,你幾想扮冇事發生都好,千祈唔好撳呢個掣。曾經畢竟真係曾經,過去唔等於會消失。删咗文,仲有千千萬萬張cap圖流傳,到時仲要俾人踩多句話你又要威又要戴頭盔,柒咗又怕認:「做乜del post呀?身有屎呀?心虛呀?」愈想扮無事發生愈會俾人炒返起件事,祝你好運。
 
② Hide from Timeline:咁可以減低你個柒post嘅曝光率,人哋嚟你fb wall見唔到,冇得笑你,你受嘅唾罵同嘲諷會少啲啲。但如果其他地方有隨意門(一定有咖傻豬),人哋都係入到嚟咖。加油,忍一忍就會過。
 
③ Edit Privacy Setting:改為「Only Me」,封閘唔俾人入嚟鬧你住,但當人話「做乜del post呀?身有屎呀?心虛呀?」又可以低調咁開返個post,再死口唔認:「冇呀,冇del post呀,我好接受各界聲音咖。個post喺度,你睇?」然後俾人笑或鬧多陣啦,覆水難收,你以為出柒post真係唔使本?
 
④ 如果你用嘅係page而非personal account,咁應該冇得校privacy setting,有冇得hide from timeline我都唔知哈哈哈,我都唔用page嘅。但如果你咁巴閉用page,請個page admin啦,不過要請個真係識玩fb嘅。唔好請啲自作聰明亂抽火水之後鬼祟del post,或者一有異見者就亂block,同埋最好身家清白啲啦唔係一陣又俾記者話你請埋啲淫賤偷拍慣犯。
 
---
柒post出咗就係出咗,你想點抹都抹唔走,極其量只能以不變應萬變博盡快有人柒過你。早知今日,何必當初?柒少陣當幫自己忙,啾咪。♥

全文 414 字 (唔計英文、空格、標點)