(beta 公測版本)
< 返回

《過年送蝦子麵,邊隻牌子好?》

作者:雞絲陳
日期:2016年2月2日

【短話長說師奶技術文之過年送麵要識揀呢】
 
話說,我有個同事,份人比我實際100倍。佢其實唔係有錢人(做得我同事人工真係唔會高),但生活尚算簡樸,覺得夠用就好。佢成日都話:「我又唔需要呢啲嘢,點解啲人咁鍾意送埋啲唔等使嘅嘢俾我。」喺佢眼中冇用嘅嘢,即使係賀禮,佢都會拒收,或者收完跟手就轉送去佢覺得更適合嘅人度——包括結婚同新年禮物。近排我哋講起過年送禮,佢一如以往表示極度反感。「我真係好憎收朱古力,我屋企都冇人食朱古力!我情願你送麵,或者菜,或者送條新鮮魚一齊煮,或者送啲靚生果都好吖。」佢一嚟唔食零食(健康到核爆,今日佢食燒腩仔竟然剝咗塊脆皮唔食!!!),二嚟盡量唔買大陸嘢同唔幫襯大集團(連結婚都係好努力搵alternative,真係用心良苦),所以我呢排見親啲咩「辦年貨另類選擇」就send俾佢,點知佢尋日直頭同我講:「我決定唔送禮呀。可能因為我通常收到嗰啲禮物都唔開心,所以我都冇咩動力送禮俾人。我好討厭呢種好似交換禮物咁嘅模式,你叫我笑晒咁多謝我真係做唔到。新年個個都係咁…我想打破呢啲規則,我寧願唔收。」佢又真係做得出同親戚講「下唔使送俾我,我哋唔食架」orz,知行合一之餘佢真係有話直說。
 
不過in case大家冇佢咁夠guts抗衡呢啲送禮文化(佢真係完全唔跟主流嗰啲客客氣氣打招呼打交道嘅玩法架佢orz),而又想喺跟隨呢啲送禮傳統嘅同時揀啲真係優質嘅嘢送俾你當係親戚嘅親戚或你當係朋友嘅朋友,可以睇睇以下落嚟我present嘅呢啲數字。我重申,我其實唔係憎壽桃牌,雖然佢真係好難食,但我未至於要佢死(雖然我有附和同事句「打倒壽桃牌」哈哈哈)。我只係想講,如果點都要送禮,而送禮對象係你真係鍾意、關心嘅人,咁梗係要俾啲誠意花啲心思送啲好嘢啊。如果壽桃牌咁難食都拎嚟送禮,其實是咪同親戚朋友啲關係唔係幾好?
 
因為我係個倚賴互聯網嘅廢青,加上時間緊迫,我唔會同你check晒咁多麵廠嘅禮盒裝資料,只會搵現成資料比較下。以下呢啲數字我喺參考購物網嘅——壽桃牌係睇 hktvmall.com,其餘三間麵廠(香港仔有記、張榮記、蝦記)係睇 ztore.com。
 
吖首先,提返大家,平時我哋去麵廠買麵,老派麵廠都係按斤秤嘅;而新派啲或者盡量想追上時代做好branding嘅品牌,會用gram去計重量。一斤大概等於605g,多數麵廠就算rebrand過,都會用返around 300g(即係半斤)同600g(即係一斤)去分pack。咁大家睇啲價錢同重量應該會覺得清晰易明啲。
 
大家咁鍾意送嘅「香港品牌」壽桃牌,我呢幾日見7-11好似賣~$120/2盒咁,上HKTVmall睇呢,呢啲禮盒款就寫建議零舍價$99.80,而家優惠價$61.80。
 
============
【壽桃牌】中國製造,含防腐劑 ← 佢自己寫架,我陳述客觀事實咋
‧ 禮盒系列蝦子麵 $61.80 / 684g(12個),附橄欖油特製醬包
‧ 禮盒系列瑤柱麵 $61.80 / 684g(12個),附橄欖油特製醬包
‧ 禮盒系列鮑魚麵 $61.80 / 684g(12個),附橄欖油特製醬包
============
 
雖然我手頭上係有個「本地麵廠地圖」,上面有四十幾間麵廠或門市嘅基本資料,但係有好多麵廠都係做街坊生意,轉咗型或革新咗嘅唔係好多,我就唔逐間查問佢哋有冇賀年禮盒裝喇。貪就手,上Ztore望望,香港仔有記、張榮記、蝦記都有禮盒裝。不過大部份都已經售罄,麵廠自己嘅新春預訂都已經截咗單,如果真係好想買,可能要去門市或者有上架嘅超市搵下。
 
============
【香港仔有記】香港製造,冇防腐劑 ← 佢自己寫架,我陳述客觀事實咋
‧ 金裝頂級蝦子麵 $45 / 50g*6個
‧ 金裝雲腿瑤柱麵 $45 / 50g*6個
‧ 金裝瑤柱蝦子麵 $50 / 50g*6個
‧ 金裝極品鮑魚麵 $62 / 50g*6個
============
【張榮記】香港製造 ← 佢自己寫架,我陳述客觀事實咋
‧ 金方蝦子麵(禮盒裝)$65 / 60g*10個
‧ 瑤柱蝦子麵(禮盒裝)$85 / 60g*10個
‧ 鮑魚瑤柱蝦子麵(禮盒裝)$108 / 60g*10個
============
【蝦記】香港製造,冇防腐劑 ← 佢自己寫架,我陳述客觀事實咋
‧ 金牌蝦子麵(禮盒裝)$80 / 600g ← 佢冇寫但我憑經驗知道佢哋一斤有9個麵餅
============
 
小結一下啲數字,同埋用幾間都有賣嘅蝦子麵資料比較所得,就係壽桃牌同張榮記嘅蝦子麵禮盒裝都係大概$60-65/斤;而蝦記同有記貴少少,$80-90/斤。麵餅有幾多個唔重要,多啲麵餅咪即係佢每個麵餅輕啲細啲,圍返成盒都係差唔多重。
 
至於包裝,我好懶,唔貼link喇,自己search喇懶鬼。簡單講,壽桃牌、香港仔有記、張榮記包裝都幾得體,入面每個麵餅係獨立包裝(其實我最憎,製造無謂嘅垃圾,討厭),而蝦記就係本身用自己logo嘅袋裝好一斤封口,再加個唔太硬嘅紙盒。
 
味道就好主觀嘅。壽桃牌我覺得真係好難食,又冇湯底,麵質又差;香港仔有記食過但印象唔深刻,不過不失咁,但佢都幾出名,送禮應該唔失禮;張榮記風聞已久仲未試過,評價唔到,又係出名嘅;蝦記唔算出名但我近年做義工結咗緣又做咗熟客仔,平心而論湯底好飲不過麵都有啲快淋,唔好煮太耐(換個角度可能幾啱老人家,易啲咬易啲消化)。
 
拿講返現實——壽桃牌就歲晚到初一二三我都好肯定你可以喺各大超市同便利店買到,其他麵廠就歲晚收完爐之後新年就會休息到唔知正月幾多先啟市。買壽桃牌梗係方便啦,但真係好難食,又中國製,又有防腐劑,根本就低質劣食,又唔係特別平,真係請大家三思而避買。另外嗰三間,都係香港製造,有兩間註明咗冇防腐劑(張榮記冇提及),而且價值都唔係貴好多(其實貴啲咪好啦,矜貴呀,送禮咁鍾意體面貼埋個價錢落去吖笨)。不過let me recap lah:有兩間喺Ztore都全數售罄同埋麵廠自己嘅新春預訂都已經截咗單,如果真係好想買,可能要去門市或者有上架嘅超市搵下。淨返仲有個選擇就係我本身都有食嘅蝦記,應該仲未收爐,仲可以喺Ztore或親臨喺土瓜灣嘅麵廠買(直接喺麵廠買好似平幾蚊)。
 
其他麵廠你可以打電話或親身去問下佢有冇禮盒裝——如果你好介意有冇個唔食得嘅紙盒裝住懶靚嘅話。地圖喺度,可以睇下屋企或公司附近有冇麵廠:https://www.google.com/maps/d/viewer?mid=zQYt8mgvVCg0.kdwUawWTcUgY&hl=en_US
 
好多人問我呢啲乜記乜記好冇食,咁講啦,你哋連壽桃牌都拎得出嚟送禮,點解唔俾個機會啲本地麵廠呢?真係靚嘅蝦子麵,掉落清水煮會變大地魚湯咖,壽麵牌嗰啲變鹼水咖咋。為咗自己同親友健康,收手啦,唔好再買壽桃牌喇。回頭是岸。

全文 1979 字 (唔計英文、空格、標點)