(beta 公測版本)
< 返回

《疫境自強》

作者:何栢良
日期:2020年2月17日

2020-02-04
https://www.youtube.com/watch?v=d9dVULjFglg
疫境自強: 為手機消毒

呢部機呢就係消毒我哋嘅手機同埋手機殼。噉佢個原理呢就係紫外光-C嘅射線呢,就去到殺死呢啲手機上面嘅細菌、病毒。噉佢冇開關掣嘅,你插咗個插蘇,通電,噉等一陣呢佢就着咗呢個顯示燈呢,你見到ready呢就可以開始用。嗱,前面有道門,噉樣你用之前呢就先先,即係喺個手機度就拆——如果有殼呢就拆咗佢出嚟,就搵紙巾就抹咗啲老泥嚟。因為有老泥呢,遮住嗰啲紫外光線射唔到呢,噉個效果就會差啲嘅。而家你輕輕就,手機啊手機殼呢就擺咗過嚟先。噉抹完呢你就打開道門,就拉個……輕輕拉個櫃桶出嚟。櫃桶呢度有一個透明嘅玻璃瓶喺度,就唔係話一個空殼嚟嘅。噉你呢就輕輕擺個手機落去啦,同埋個手機殼。嗱你譬如有少少金屬呢啲係冇問題。噉佢係紫外光嘅原理。你擺咗落去,就推返呢個櫃桶埋去,噉你一閂呢道門呢,佢就自己自動會着機㗎喇。噉而家關門,佢就開始㗎喇。噉嗱你睇到個顯示屏呢,就開始有個顯示就跳跳下呢。佢有兩個階段㗎,第一個階段佢就快速清潔。你見佢呢度有個顯示燈,一路向前移動緊嘅。嗱佢去到第一個,嗰個話嗰度呢,佢就由嗰個快速轉咗去嗰個深層清潔。嗱呢個成個過程完咗呢,大約就係六十秒嘅時間。嗱你睇住佢呢度呢,就一路做緊,即係入便呢就放緊紫外光燈。噉你呢個時間呢就唔好打開道門喇,佢跳緊嘅時候就唔好打開道門。噉呢度到佢,呢個顯示去到最尾呢個位呢,佢就會停㗎嘞。當去到最尾呢,佢就會跳一個字出嚟,就跳返ready。嗱我哋等多陣佢就完㗎喇,呢個顯示佢係一路跳緊。嗱,ready喇。噉即係佢完成咗個cycle喇。噉同樣呢,你就打返開道門,就輕輕拉嗰個櫃桶,就擺返你嗰啲手機啊,殼出嚟。噉樣你係有另外一部機呢,就你唔好閂門住,就另外一部機呢,就好似頭先噉樣呢就重覆擺落去,就閂櫃桶,就閂門。因為你一閂門呢,佢又試再一個循環,噉樣噉樣去到去到用。噉如果你係,已經用完㗎喇,唔會再用㗎喇,就呢個時候呢就,關電源,跟住先閂返道門。一譬如有多同事用呢,噉你就唔好成日開關,太頻密開關嗰個電源掣。噉所以呢你譬如開……有一路輪住有機入去,你咪輪住嚟去用囉。噉呢就希望大家同事呢都,小心去用呢部機啦,因為個機本身就都係公物啦,就一位善心人士就捐畀醫管局裏面嘅前線醫護人員使用嘅。OK,同大家解釋到呢度。

---
2020-02-11
https://www.youtube.com/watch?v=zdGjfqVL6IM
疫境自強: 防疫通識、人人都要識

二零二零年二月十一日早上十點三十分。我係何柏良醫生。青衣長康邨康美樓嘅事件,同埋有一家人年初二食火鍋,其後就陸續有家庭嘅成員確診呢,已經係響起警號。我希望市民大眾可以小心聽我下面同大家講嘅一番說話。

咩叫新型冠狀病毒呢?佢係二零一九年喺中國湖北省武漢市發現一種嘅新型病毒。佢已經傳到香港,喺內地呢就周圍都係,喺外國亦都有好多國家有確診嘅個案。佢同普通傷風感冒流感呢啲比較呢,佢有高嘅傳染性,個死亡率就都係明顯高一啲。你可能會經過接觸呢啲受感染人嗰啲嘅飛沫,佢哋摸過嗰啲污糟邋遢嘅嘢,或者甚至乎係佢哋嘅糞便而受到感染。

為咗降低我哋同埋屋企人受新型冠狀病毒感染嘅風險,我哋每個人都要執行,要做嘢,幾個簡單嘅措施。呢啲措施係有效,同埋係好基本嘅。

嗱,第一,要做好廁所嗰個環境衛生,就沖廁所之前要冚咗個蓋。地下嗰啲去水渠位,噉出去呢就有一個U型嘅隔器。呢啲去水位每日要倒至少五百毫升嘅水落去,唔需要加漂水。噉樣先至可以防止啲病毒就經呢啲渠位呢,就倒流返去廁所或者浴室裏面。

第二呢,經常用番梘或者火酒搓手液就清潔雙手。特別就喺外出嘅時候呢,摸過一啲污糟邋遢嘅嘢,或者一啲表面,係好多其他人會摸嘅,譬如係扶手啦,𨋢掣啦,就的士嘅門柄,電動扶手梯呢啲扶手呢,就都係好多人摸,係污糟嘅。

第三呢,外出嘅時候要戴口罩。如果你有外科口罩呢,就要學識點樣去到佩戴,同埋呢就睇返我之前拍嘅「五戴要求,缺一不可」嘅短片,就知道呢有乜嘢唔好做。嗱,外科口罩呢,用完之後呢就要妥善噉掉咗佢,唔好重複使用。因為用過之後呢,個口罩表面呢可能已經有其他人有病毒嘅飛沫呢,黐咗上去。你重覆使用呢,可能會令到自己中招。嗱,如果冇外科口罩呢,就,可以睇下搵一啲棉質嘅口罩,係可以清洗消毒嘅,用完之後用番梘同埋加少少漂白水呢就消毒,乾晒之後先至再用。未曾清洗呢啲棉質口罩,之後呢如果係用過呢就,唔好再用喇。

第四呢就避免去一啲人多擠迫同埋唔通風嘅地方。如果係一啲朋友、其他親戚嘅聚會呢,可免則免。如果係要大家有聚會呢,就算係喺室內嘅呢,就需要佩戴返口罩。

大家就記住呢,就新型冠狀病毒呢雖然係嚴重,但係我哋唔需要盲目恐慌,只需要提高防範嘅意識。要留意呢,唔好傳呢啲fake news啊。即係喺即時通訊嘅軟件啊,WhatsApp啊,面書啊,呢度上面有好多謠言啊。部份呢啲係惡意,想引起群眾嘅恐慌。嗱大家唔好畀呢啲恐慌嘅情緒呢,影響咗你嘅常識。我哋一定要冷靜,無論發生咩事呢都要冷靜,我哋要團結一致,就採取以上嘅基本嘅衛生措施呢,噉我哋先至可以呢就將嗰個病毒呢,就對香港造成嘅傷亡呢,減到最低。

嗱大家要記住,病毒唔等人,係時候大家一齊「疫」境自強,做嘢喇,香港人加油!

---
2020-02-17
https://www.youtube.com/watch?v=Ev61NMi0HtA
疫境自強: 口罩通識、人人都要識

何:港大感染及傳染病中心總監何栢良醫生 李:李俊輝醫生

何:嗱噉你去到睇呢啲口罩呢,你就要留意:第一,佢係咪用完一次就掉呢?即係佢嗰個標籤。有好多佢係韓文或者日文。噉如果佢標示係重覆再用呢,就佢唔係外科口罩嚟。噉呢個唔係最理想㗎喇。噉第二呢就係究竟佢幾多層?即係一層吖?兩層吖?定係三層?我哋而家講呢就,最理想就要防疫呢係有三層呢啲嘅外科口罩。噉如果你呢啲好複雜,你要睇呢就,係唔係有……符合呢兩個要求,噉你就知道呢,佢係唔係我哋所講呢啲外科口罩。噉但係就,都明白到而家呢就唔係咁容易買到口罩,所以呢啲就唔係咁理想,噉如果你係有嘅話呢就盡量用返外科口罩啦。

何:有兩面㗎啦,有顏色嘅就向外,白色嘅呢就係向自己,OK?嗱,上面有一條鐵線嘅,鐵線係向上面。嗱呢度有一個風琴位噉樣嘅。噉你擺埋去嘅時候鐵線向上,貼埋自己度,就就一就嗰個面形,OK?就一就個面形。噉你可以而家拉嗰個風琴,或者你勾咗耳仔先都得。嗱,譬如而家先拉嗰個風琴。你跟住圈呢個耳仔,嗱圈嗰個耳仔呢就,避咗呢唔好勾到自己嘅眼鏡,如果唔係你嗰個眼鏡呢就會跌㗎嘞。噉呢就撳好佢,嗱你手乾淨加嘛,噉即係你戴咗嘅時候你慢慢,校返清楚啲位置呢,即係唔啱位就褪一褪佢呢,褪……

何:點先知道自己戴得啱呢?嗱就攞塊鏡出嚟睇清楚,check清楚側邊啊,上下啊,就冇漏罅。有罅就撳一撳佢。

李:好,綁繩嗰啲喇,噉其實原理都差唔多嘅啫。噉首先就係,喺呢個位,箍好個鼻先。跟住上便呢兩條帶就,兜過上便……即係個耳仔嗰度,跟住後面打個結。

何:嗱你呢個綁繩呢就,你綁完咗唔啱位呢,你可以褪一褪佢。嗱噉上面呢度同樣呢就呢條帶就唔好勾到呢個眼鏡,喺耳仔呢度過囉。下面就喺下面頸呢個位。嗱噉你綁呢個纈呢,就蝴蝶結。噉你除嗰時呢就……掹咗你可以除開佢噉嘞。除落嚟呢就唔好掂到嗰個藍色口罩嘅表面。

李:係嘞。噉可能噉樣,就唔好掂到前面。

何:係嘞,然後掉落垃圾桶,嗰度有個垃圾桶㗎喇。然後就……

李:洗洗手。

何:嗱而家嗰個疫情呢其實就係好嚴峻,吓。噉我最擔心呢就係香港出現,喺社區裏面有超級傳播嘅嗰個嘅事件。如果我哋單靠政府呢係唔足夠。噉而家我哋呢個時候都要互相提醒啦,就政府、商界同埋市民大眾呢,大家都做好自己嗰個本份,就採取一啲簡單嘅衛生措施,噉呢就避免喺社區裏面呢,出現嗰個超級傳播者嘅事件,吓。

李:好,噉所以呢就……

何、李:口罩戴得啱,防疫好簡單。

何:拜拜。

李:拜拜。

全文 2669 字 (唔計英文、空格、標點)
備註: 選自香港大學感染及傳染病中心總監何栢良醫生嘅「疫境自強」系列,嗰個系列另外有外語影片。