(beta 公測版本)
< 返回

《論準國歌《願榮光歸香港》升級2.0》

作者:牛刀
日期:2019年9月10日

香港之歌有好多首。

https://www.youtube.com/watch?v=Qf-hFthH65A
例如呢首

呢期多咗Thomas dgx yhl (https://www.youtube.com/watch?v=sO7437tbF7Q)等人創作嘅《願榮光歸香港》:
https://www.youtube.com/watch?v=sO7437tbF7Q
結合《天佑吾王》嘅前奏

歌詞有多個版本,初稿原版(「通用版」)係現時最為人熟悉。通用版宣傳攻勢在先,除咗喺連登、YouTube上載文字同MV,亦有Telegram文宣組配合製作歌詞圖。近日抗爭現場亦不時聽到。908美領,長江中心樓下有手足邊舉三指邊播,行上舊政總亦有人唱;前一晚喺太子都聽到。呢啲都係不才在場見證,歷歷在目。而909晚10點太古城中心300人合唱,亦蔚為奇觀:https://youtu.be/GesETC5lBvU

無可否認,原版早着先機,先入為主,又同抗爭現場「有機結合」,食正抗爭者保家衛國、建國興邦嘅熱忱,略為填補到國魂方面嘅心理需要,地位逐漸變得難以取替。可能因為咁樣,冇耐「Atmostas 製作組」成員喺連登出post (https://lihkg.com/thread/1555085/page/1) 推廣「革命版」詞作,就取得兩極反應。

該製作組組名取自The Baltic Way歌曲Atmostas Baltija。製作組基於原曲重新填詞,製作823香港之路主題曲。
https://www.youtube.com/watch?v=raLGa4JjzC4

而「革命版」或者2.0,其實係製作組經原作者同意,所奉獻嘅新猷。原作者已經將「革命版」嘅初稿列入「《願榮光歸香港》公開資料」(https://docs.google.com/spreadsheets/d/1pePpwJnh6p6hICjFD2A9c1H2SD-YazevzpplynMXXjc/edit#gid=1252851979),承認為其中一個版本。再者,製作組喺post度清楚指出,佢哋潤飾嘅時候依然保留原詞最核心嘅意念,旨在押埋韻同凸顯抗暴反殖嘅決心,使到聲韻同聲勢並重,彌補原版之短,增添原版所長。
https://soundcloud.com/vatnid/glorytohk2

謹錄歌詞如下,諸位姑且過目:
//無畏 揭黑幔 復血仇
民眾 暴政下 受困囿
人生既自由 但瞬間轉烏有
革命才可解詛咒
朋友 快起義 滅惡讎
同捍衛信念 莫退後
寧慷慨性命 誓要將小島救
以血汗換光輝不朽
萬劫中 路上重重障礙
權閥惡霸佔據家園廿數載
抗殖民 全城亦憤慨 無償衛要塞
智勇 破虜 殺退疆外
黎明隨至 戴盔冑 護我城
從來無悔 衛正義 時代革命
同謀民主與自由 萬世皆響應
戰絕榮光必得勝//

不才相信,諸位憑平心、慧眼,自然感受到製作組嘅苦心同巧思,認同製作組所言不虛。「革命版」唔再問「何以」,而係直視共同體殘酷命運嘅根源,誠心號召奮起革命,直接交出凝聚鮮血、辛勞、眼淚同汗水("blood, toil, tears and sweat")而成嘅答案。知行合一「拒默沉(即係『沉默』)」,行動就係響亮過言語嘅答案(actions speak louder than words)。黑警問都冇問就舉黑旗,義民未問清楚就遭受暴力對待。黑洋紫荊旗嘅底色,不言而喻。慎思明辨嘅抗爭者,無端白事贏得浸大所謂協理副校長(外務)楊犬志剛筆下嘅「洋紫荊革命」名號,亦懶得過問。黑幔一揭,革命足以石破天驚,唔會輸蝕得過原版中明知故問發聲,憑藉良心嘅一點澄明、八方和應。

心清眼亮,就知兩個版本意境上冇衝突。有論者咁都扯到去「分化」呢啲無稽之談,實屬小人之心。老實講,若然有心奉陪,誅心落去,大可以「來說是非者,便是是非人」嚟到回應。之不過,正如抗爭路上兄弟爬山,歌詞版本兼容並包,對另類意見都可以開放啲。揣測論者用意,可能冤枉咗純粹關心則亂嘅人,咁今次就真係中計,中晒分化撚嘅計喇。

又不過,有時啲磚家冇嘢搵嘢嚟講,仲會搵着好多其他嘢,仲要係解釋唔到點樣「曲高和寡」。

啱音同砌字
以為可以任砌,求其搵位擺「光復香港」。唔係聽得「萬能key」多就以為有咁萬能啊嗎?原版「要光復這香港」嘅「這香港」微拗,感情大過天,以詞就曲,都可以拗。

畏深畏難
我自己覺得有啲深嘅,但唔同意係賣弄。國歌係國家象徵,用喺嚴肅正式嘅情境,遣詞用字深些少都係出於需要。而且美國國歌都有perilous、ramparts、spangled、gallantly,咪又係傳授落去。製作組錄埋音,下低另外有巴打標埋讀音啦,練下先啦。難就唔做,咁件事就永世都唔可行。獨立建國都係同樣道理。咁仲出咩國歌唧。

似流行曲?
一、大多數流行曲流行靠淺白,又深又有條件流行其實都幾犀利;二、我諗電影《風雲兒女》主題曲都算係流行曲嚟嘅;三、唱到流行曲咁?咁咪改唱法囉,雖然我唔覺。

B段繞口
咁其實係怪作曲嗰個咋喎。又其實節拍唔使咁死㗎喎。純音樂可以改編成進行曲;到到配歌詞唱,節奏可以慢啲。

血腥暴力內容會過時?
一、其他國家有例子;二、暴政加諸嘅苦難背後,係想描述我哋更加勇敢同團結;三、國族抗爭史塑造國魂,國魂係國族嘅根,又話毋忘初衷?

押韻又插?
押埋韻都畀人話係咩玩法?十之八九有押韻。你估個個都係家駒咩?

---

唔講太多喇。行動最實際。

香港地搞文化事業,好艱難㗎。負評狂潮,非戰之罪。萬莫心灰意冷。求其錄,聊表心意。加油。
https://soundcloud.com/bullsword/glory-to-hong-kong-2

---

【延伸閱讀】
點解延伸?
因為啲人扮識填詞:https://medium.com/%E4%B8%80%E5%A4%9A%E7%9B%B8%E5%8D%B3/fair-comment-about-abrahim-wing-him-chan-the-lyricist-b4e3d32829a0
又會忽然好有文化囉:https://medium.com/%E4%B8%80%E5%A4%9A%E7%9B%B8%E5%8D%B3/li-ka-shing-mao-zedong-over-interpretation-cb47c5605f6d
其實都係呃clap啫。

全文 1438 字 (唔計英文、空格、標點)