(beta 公測版本)
< 返回

《「你想點?」》

作者:林非
日期:2015年12月11日

做人就總會有無數嘅壓力,有啲壓力係無可避免,只能排遣,有啲壓力就好無謂,無好過有。
 
就算話無咗 TSA 之後啲家長又係照谷,無錯,大概係真,但咁唔代表 TSA 就要繼續存在嫁喎,一啲無謂多餘嘅嘢就應該取消,就係咁簡單。咁你話到時啲家長又去谷第二啲嘢,咁第二啲嘢係乜先?到時咪去處理呢個「第二啲嘢」嘅問題囉。
 
反而我真係比較有興趣嘅係,香港真係好少可問學生「你想點」。我見唔少人真係少年已經顯示出佢唔係「讀文法中學」嘅材料,我有同學中三後去咗打職業網球,更加唔使講有無數咁多朋友今日係專業嘅音樂家,好多都係中三、中五已經知道自己天份喺邊。佢哋好彩,發掘到,培養到,但我相信好多人埋沒咗。因為香港條路其實越來越窄。原因?因為迫你個個都要循「文化中學」條路上囉,然後將職業訓練邊緣化,「偽學問」化,但同一時間大學就降格職業訓練所同真正以「職業導向」為本嘅教育爭.飯.食。
 
以前你讀完中三可以去讀建築,去讀咩秘書,到大少少嘅都有唔少例如學護等課程讀,讀完出黎都叫做一技之長,搵到下食。今日你點都要死掂個 DSE 先,然後報一大堆坊間嘅濕鳩崛頭進士,例如早前爆出不合辦學資格嘅「護士課程」,然後九曲十三彎先上得返大學讀一樣嘅嘢。咁當然,上到大學就用英文讀,正所謂真心話用英文講真心好多,學問術語用英文寫都勁咗唔少,咁先搵到食。
 
成個社會風氣就係咁樣透過副學士、削減大學學額等德政而塑造出黎。而家仲有好多人認為「音樂搵唔到食」,覺得「讀商科讀得好咪有六位數月入囉」,但,喂,你畀一個無乜考試因子嘅人去讀神科,出黎只會做一條濕柴(點唔撚着),夾硬畢業咪又係搵幾千蚊到萬零蚊,但如果佢係有音樂天份又做音樂嘅,係,係無六位數,但話唔埋有兩三萬,你話邊條路好啲嘞!

全文 622 字 (唔計英文、空格、標點)