(beta 公測版本)
< 返回

《品味‧正義?自由意志就係開心食屎》

作者:散彈一號
日期:2015年12月8日

從前有一個地方,呢個地方有兩個部族。食飯族同食屎族。顧名思義,食飯族食飯,食屎族食屎。食飯族當然食得津津有味;食屎族見狀,就一口咬定佢哋係做咗虧心事,然後就話只要有民主制度,咁呢個社會就應該公平啲,大家應該一齊食屎。

個情況好有趣嘅。食屎族嘅論述,就係大家唔應該食飯,因為食飯食得咁開心就一定係仆街陷家鏟。不過佢哋一有機會,又會加入食飯族。為免出現呢個情況,任何食屎族嘅人如果懷疑食咗飯,就會俾人吊起嚟打,打到佢嘔返舊飯出嚟為止。佢哋對「叛徒」嘅手法,梗係嚴過對食飯族啦。

所以食屎族有個好有趣嘅情況。雖然佢哋個個都話食飯唔啱,但佢哋內心深處係知道其實個個都想食飯嘅。如果有人有飯食唔食,食屎族私底下仲會笑鳩佢添。

呢個故事入面,究竟食飯族做嘅嘢合唔合理??

我認為答案其實係「D. 無從判斷」。最緊要但冇講到嘅資訊係:究竟夠唔夠飯食?

---- 伸延日經,大家嫌長可以唔睇 ----

《選擇》

如果社會唔夠飯食,咁食屎族當然係冇得「選擇」。你老母,那有飯?只有屎,沒有飯。

假設夠飯食喇,食屎族嘅人全部走晒去食飯。咁樣算唔算有選擇?有啲人話算。因為有屎有飯任你揀嘛。

但同時間,如果你死都唔會揀食屎,咁其實你冇「真正」揀過。如果揀嚟揀去都係飯,永遠唔會揀食屎,仲點算有選擇呢?

所以,真正嘅選擇,係所有選項都有可能成為最終選擇。但係⋯⋯食屎喎!係呀。所以一個肯揀食屎嘅人,係有選擇,即係有自由意志。但係如果佢真心唔鍾意食屎,咁佢就蠢咗少少。

所以,點樣有真正嘅選擇,而又唔會做蠢人呢?就係你真心鍾意(或者唔介意)食屎,認為食屎又好,食飯又好,其實冇所謂。

所以,#自由意志就係開心食屎。

所以,人生在世,明明有飯食,但自願食屎,先至算係真正活過。

所以,食飯族唔肯食屎,食屎族恨食飯但又唔俾人食,其實佢哋嘅人生,從來都冇任何選擇,冇任何自由意義。偏偏佢哋就係咁講 #食飯嘅品味,#食屎嘅正義。但係冇選擇,就冇所謂品味;冇邪惡嘅引誘,就冇所謂正義。呢樣嘢,無論講幾多次,佢哋都唔會明嘅。

全文 706 字 (唔計英文、空格、標點)