(beta 公測版本)
< 返回

《我地必須鬥長命才會贏》

日期:2019年6月29日

又有一條人命因為反送中而犧牲。
 
林鄭月娥,我知道你都係不聞不問,鐵石心腸,喪心病狂。依家呢一刻,應該仲想慶祝七一回歸,寫緊咩演講詞大吹廢水粉飾太平。雖然你口口聲聲話自己都係孩子既母親,自己都有會心痛之類。你有無想像,有人接二連三為左你而自盡?
 
你算係咩野東西,做咩要香港大好青年為你一個個送死?你點解要令到我地都愛護既香港,染上一片鮮紅色?呢個就係你當初參選話愛香港,愛年青人,想同佢地同行既創下既所謂豐功偉績?
 
依家所有野指向既真相已經好清楚,係你同你既團隊自推惡法,諗住送俾中央一份大禮物,慶祝國慶七十週年,點知擦鞋擦錯位,爆發香港有史以來人數最多既遊行。你扮晒謙讓話暫緩,話道歉,但大家都知剛愎自用既你唔會甘心,我有咩錯。你一定會怨天怨地話自己唔好彩,有人玩針對,玩煽動,外國勢力一齊蝦你!
 
好啦。依家要搞出人命先安樂。有堆媽媽講得岩,本是同根生,相煎何太急。你如果仲有考第一既一絲智力健在,仲想香港人認你係一份子,仲想係史冊留低你尚有一點良知既註腳,你應該即時下台。但我知道,死多幾條命,你一樣會死撐,甚至唔會俾中南海知道有人死諫。依家既現況係點,一直無人明確指出:
 
政府話暫緩,其實係赤裸裸呃緊香港人。黃宏發指出左,連李慧琼都俾毛姨姨迫住要講,二讀辯論可以下年就再黎過。根本就唔係讓步!警察暴行,周街打人打記者,唔出委任證,使用武力究竟數字幾多,無人知,無人查,無人追究,獨立委員會唔成立,咩都無做。更加唔好講釋放示威者。尋晚,又一塊地因為立法會完全無用,割左比大陸。我地咩都做唔到。
 
根本就無任何野得到左。更加唔好講咩階段勝利。仲見好就收?好刺耳。見好就收會有人仲走去死咩?
 
依家呢一刻,你地仲係恬不知恥,甚至為左阻隔人民既聲音,用上過半萬警力,圍封整個灣仔海邊,要確保升旗同埋慶祝活動能夠如常進行,縱使水馬同圍板已經圍到天一樣高。我諗俾豹子膽你地,都唔敢為左追悼死者而取消七一所有活動。因為你地都唔係香港人既政府,你地只係一班向政權搖尾乞憐既人渣,仲要係渣中之渣。
 
我會繼續大聲疾呼,叫所有朋友留番有用之軀。不要讓血債再繼續高築落去。人死左,咩。償。都。無。用。唔好再為呢個麻木不仁既殺人政權嘗試討價還價。無用的。真係完全無用。
 
重申四大訴求:
(1)所有問責官員下台,向香港人謝罪
(2)撤回送中惡法
(3)必須追究警隊暴行
(4)釋放無辜示威者,撤消一切無理指控。
 
大家可以悲憤,可以流淚。但唔好俾情感沖昏頭腦。我地仲有好長既路要行。
 
一個普通香港人

全文 902 字 (唔計英文、空格、標點)