(beta 公測版本)
< 返回

《蝶蝶教你政治ABC》

作者:林璃蝶
日期:2015年12月6日

每到選舉,就會有啲「黃絲」叫人投泛民主派,理由係泛民得到嘅議席只要保住「關鍵三分一」就可以阻止惡法通過。既然係咁,我哋都唔洗出席咩集會同抗爭啦,我地信任個議會體制㗎嘛,我哋投咗啲泛民議會入去㗎嘛,咁佢哋自然會反對㗎啦,啲惡法唔會通過到㗎wor~~~

其實我真係覺得做香港人好攰。明明投咗啲so-called泛民入議會,但係自己都要走出嚟抗爭,點解會咁﹖就係我哋成日講嘅議會失效囉。咁咩係議會失效﹖簡單嚟講,投咗啲泛民入去都係廢嘅。廢嘅原因有兩種—制度廢、人廢。

1. 個制度廢(所謂廢,即係不公,根本不能準確反映唔到市民嘅意見):
A. 黃絲:「多得有泛民『關鍵三分一』,網絡廿三條先無通過到咋﹗」
--->錯﹗
事實上,網絡廿三條由政府提出,只要在場過半數議員嘅贊成票,即獲通過。
而今屆立法會,保皇黨佔咗43席,遠遠超過全數70議席嘅一半,要通過真係話咁易。呢度亦解釋咗點解東北、三跑之類由政府提出嘅議案會通過。
黃絲再問:「咁⋯⋯咁點解上次又無通過到網絡廿三條﹖」
--->咁係因為有某啲議員拉布,又咁啱撞正立法會休會期,同任何立法會嘅合法投票無關。

B. 黃絲又問:「但係真係因為有『關鍵三分一』,先通過唔到假普選咋﹗」
--->呢個啱一半啦。

的確,要改變行政長官及立法會的選舉制度(aka. 真普選?),係要全體議員三分二贊成先通過到。呢個就係所謂「關鍵三分一」嘅用途,就係唔比so-called假普選方案通過,but that's it。係現有體制,泛民最多只係做到咁多咋。嗰啲咩阻止網絡廿三條呀,東北呀,同「選舉制度」無關嘅惡法,係幾時都通過得㗎﹗

而且,好聽啲講,「少數否決權」,即係可以同假普選方案say no;
掉返轉講,即係永遠都無辦法通過「真普選」方案,因為就算提出,你都要獲得成個議會嘅三分二人投贊成票wor﹗保皇黨會唔會肯投你個「真普選」方案呀﹖緊係唔會啦﹗

黃絲不禁問:「咁點算呀﹖」

--->革命囉,無㗎啦。不過,如果你仲相信議會功能,就至少要投到三分二以上泛民入議會,先可以控制到個議會,但係呢件事永遠唔會發生。點解﹖點解泛民咁多年來都係要話「關鍵三分一」嘅否決權,而唔進取啲拎夠三分二﹖點解泛民唔派多啲人去選﹖點解唔選埋功能組別,係咪真係原則問題﹖
呢啲嘢好陰謀論嘅,有啲人會認為咁樣先可以拎泛民同保皇玩扯貓尾之類,正所謂「民主黨最唔想香港有民主」,否則泛民就無咗價值。呢啲陰謀論,因為無非常確實嘅證據,我就唔在此多講,呢個post主要講一啲數字同Facts。

C. 所謂制度不公,當然仲有成舊功能組別嘅存在啦,包括一個議席代表嘅選民比例不一。
最簡單,今屆地區直選嘅長毛,得票48,295票,得一席;
而功能組別嘅陳健波,得票0票(自動當選),得一席。
代表5萬市民嘅又係一席,代表0票嘅又係一席,但佢地係議會投票嘅嗰一票份量係一樣。再加上分組點票等問題,就係造成議會制度不公嘅主要原因。
係,個議會真係好唔公平啊,咁點算呀﹖
所以背負住幾萬選民嘅直選議員,係有足夠理據去騎劫個議會。
BUT THEY HAD NEVER.

2. 頭先講過,制度廢不特止,議員本身就係廢。

對議員有幾失望,我都唔想多講。

你睇返東北表決時候嘅片,點解無一個人佔領主席台﹖點解有啲所謂泛民議員只係離遠丟下紙﹖你睇清楚啲,永遠都係
〖大叫->企起身->繼續大叫->等到啲保安攔住->扮向前衝〗
機會,選民仲比得唔夠﹖投票投咗幾多年﹖你真係信佢哋做到嘢﹖
如果你信,你又點解要出去集會﹖點解要靠民眾力量向政府施壓﹖
如果你話,施壓嘅對象唔係政府,而係向議員,咁我想問,係咪即係佢哋會有隨時背叛嘅可能,所以先要「夾實」佢哋﹖

所以,如果你屬於又支持投泛民入議會,又支持要去集會嘅話,咁一係:
【1】 你投泛民只係覺得比投保皇好,事實上你都覺得投咗入去都係廢,所以先要去集會。
【2】 你相信投泛民係有效監察政府嘅,去集會只係表達下訴求,唔係想有咩實質行動。

我覺得無論係【1】定【2】,都無話錯嘅,只要知道自己諗緊乜,堅持緊嘅係乜就得,而唔係一邊覺得要投泛民議員入去改變議會,一邊又覺得要親力親為去抗爭,咁樣做人會好攰。
(原本諗住9up幾句,點知打咗一粒鐘 :0) )

全文 1360 字 (唔計英文、空格、標點)