(beta 公測版本)
< 返回

《十年磨一劍,一劍磨十年》

作者:置地記者
日期:2019年1月3日

十年,到底係一個乜嘢概念?

作為一個香港流行曲嘅樂迷,每一年嘅元旦都有一個盛事,叫「叱咤樂壇頒獎禮」。廣東歌陪住大家成長,我哋亦都陪住香港一眾歌手成長。與其話我係睇樂壇嘅一張成績表,不如話,我哋係睇住一眾音樂人嘅收成。由播種到豐收,時間或長或短、因人而異,動輒超過十年。

2019 年 1 月 1 日嘅最大贏家,應該係謝安琪。有邊個估到,一個生咗兩個小朋友,幾年嚟半淡出樂壇嘅 Kay ,可以以 41 歲之齡,攞到叱咤女歌手金獎?當然你可以話佢同麥浚龍喺 2018 年合作搞咗場拉闊演唱會,商台投桃報李啫。但係又咁講,謝安琪今年三首半派台歌:《人妻的偽術》、《一個女人和浴室》 (仲有古天樂合唱嘅《一個男人、一個女人和浴室》及《沐春風》,悉數出自 Juno 同佢合作嘅故事專輯《the album part one》,曲詞編質素都相當出色,謝安琪嘅 come back 成績斐然,其實都實至名歸。

如果你睇返,謝安琪 2005 年入行,努力咗三年,喺 2008 年憑《囍帖街》橫掃各大樂壇頒獎禮,包括「叱咤至尊歌曲大獎」。呢個獎,樂壇天后容祖兒入行 20 年先至攞到呀。仲有,《囍帖街》仲攞埋「四台聯頒音樂大獎:歌曲獎」。容祖兒以前未攞過,以後,除非四台和好如初,否則都係冇機會攞到。

於是,謝安琪十年前登上樂壇嘅高峰,然後 2009 年作品《年度之歌》就好似一個自我實現嘅預言咁,「唯願我懂下台的美藝,鞠躬了就退位」。之後嘅,都係歷史。生育、爆肺、現場演唱表現跌 watt ⋯⋯當薛凱琪、王菀之、衛蘭、李幸倪等女歌手陸續上位 (雖然都係挑戰唔到容祖兒) ,謝安琪作為一個歌手,地位無疑係今非昔比。再過幾年佢同 Juno 合作《羅生門》作為《耿耿於懷》十年祭嘅續集,又有邊個估到係為 2018 年嘅蒲銘心留下伏線?

---

喺謝安琪再踏頂峰嘅同時, AGA (江海迦) 亦首度取得「叱咤樂壇女歌手銅獎」及「叱咤樂壇唱作人銀獎」。 (根據維基) AGA 2008 年開始跟舒文學師, 2013 年推出首張個人專輯,同年獲得「叱咤樂壇生力軍女歌手金獎」。直到 2018 年, AGA 推出專輯《 Luna 》,幾首作品包括《無期》、《小問題》等都獨當一面,努力終算獲得認同。

「音樂係我情緒嘅出口」 (AGA, 2019)

---

相比起女歌手,樂隊投入嘅時間可能更長。 Dear Jane 2003 年成軍,都要去到 2012 年翻唱《到此為止》先至真正為樂迷熟悉。之後嘅「袁澧林三部曲」 (我作嘅,《哪裡只得我共你》、《只知感覺失了蹤》、《經過一些秋與冬》) ,透過 Pop 到爆嘅曲風加上 Youtube MV 嘅宣傳,終於為 Dear Jane 帶來更多名氣。經過 15 年, Dear Jane 首度獲得「叱咤樂壇組合銀獎」。

---

十年,到底係一個乜撚嘢概念?

足夠謝安琪來回 (樂壇) 地獄又折返人間;令 AGA 由一粒種子到盛放花蕊;僅僅夠 Dear Jane 攞到啲知名度。

足夠畀一個 Trainee 由渾渾噩噩戇戇鳩鳩,成長到曉行曉走曉教啲小朋友唔好再撞佢曾經撞過嘅板。

足夠令金融市場走過一個周期,由雷曼倒閉到加息周期行近尾聲。

十年, 3,652 日 (ok 視乎年份,可能係 3,653 日) , 87,648 小時, 5,258,880 分鐘。邊一個講法令你覺得漫長啲?抑或係,拍拖十年、結婚十年、兒子十歲,呢啲由片段而唔係數字堆砌嘅概念,令你覺得最漫長,或者最倉促?眨下眼就過?

十年,係由小伙子變成大丈夫嘅熟成年期。二字頭嘅衝勁,到三字頭已經開始變得收放自如。由習慣第一身視角出發,到開始要以家庭為計劃嘅單位,考慮嘅層面唔係一個人、兩個人而係三個人或者以上。呢種運算,就好似由計加減數變成計微積分咁,真係兩個層次。以前讀小一學加減數,中五附加數學 Differentiation 同 Integration ,咪就係六歲同 16 歲嘅故事。

十年,如果係監禁年期,講緊嘅係洗黑錢或者喺泰國古城牆塗鴉嘅罪行,比起香港嘅梁天琦「暴動」罪成嘅六年刑期,仲要多四年。呢段被偷走嘅時間,可以點樣消磨一個人嘅意志?經歷過十年嘅洗禮,一個人嘅思想,仲係十年前嗰同一個人嗎?

---

2008 年 (或 2009 年初) 嘅你,或者都冇幻想過今時今日嘅自己係乜嘢模樣,或者要達成一個好具體嘅目標吧?香港嘅環境使得大家視結婚、買樓為一啲人生嘅里程碑。即使畀你真係儲到首期上到車,其實又算係一樣乜嘢成就?

如果你嘅生命入面,有一樣 (或幾樣嘢) ,值得你投放十年嘅時間去研究、探求、鑽研,而你喺十年之後有所成就,咁你就真係可以同自己講, I made it 。唔使攞咩獎 (反正唔識唱歌都可以攞歌手獎) 、唔使幾十萬 likes (可以用買的) 、唔使周圍炫耀 (who cares?) ⋯⋯只要你自己有決心,持之以恆,念念不忘,必有迴響。

十年磨一劍,一劍磨十年。咁樣嘅一把劍,試問你又如何唔珍而重之?

全文 1415 字 (唔計英文、空格、標點)