(beta 公測版本)
< 返回

《【聖誕甜故】去兮留兮》

作者:星爺
日期:2018年12月24日

【#聖誕甜故】「點解我哋仲留響地球度嘅?」響佢十六歲生日兼平安夜嗰一晚,我突然咁問我個孫。「你唔想留響度嘅,可以搭下個鐘班太空船走架?」

「我有諗過架。我班主任話我成績算好,可以去首都大學度讀個法律學位。呢個星球除咗發電站之外乜嘢都冇,我...」

「唔想好似我咁百幾歲人都淨係做電機丫嘛。」我摸著鬚,眼望窗外,窗外碧藍嘅大海上插著一棟棟直指天際嘅發電塔,榨取海水發電,接著講:「留唔留響地球係自己揀嘅,無人迫得嚟。你歷史堂應該有教你點解人類要搬走架?」

佢皺一皺眉頭,然後背書咁背出:「幾百年前外星人侵略地球,人類幾經辛苦將佢哋趕走,但慘勝過後,受戰火蹂躪嘅地球已經支撐唔到所有人口,所以中央政府用盡咗佢最後嘅資源,殖民太空。」

佢眉頭皺得更深:「但咁都解釋唔到點解我哋要留響度架。他日嘅殖民地已經變成新首都,唔再需要母星嘅物資啦。」

「係呀,其實呢幾百年來,都係靠佢哋養番我哋。」我答道。

「咁即係我哋留響度係感情用事呀?」佢詫異中帶些少輕蔑。

「感情呀,你都可以咁講嘅...」響個孫打斷我之前,我以問題回答佢嘅問題;「你知唔知點解地球要發咁多電?」

佢開始冇耐性:「點知啫,供應俾殖民地呀?」

「都話咗咁多年来係佢哋養我哋咯。」

佢再答:「幫來往嘅太空船叉電?」

我苦笑咗下,不禁佩服自己年紀輕輕,啲答案都可以咁make sense。

「而家嘅南極,有一所歐洲咁大嘅超光速引擎,威力足以推動成個地球。全地球嘅發電塔都係供電俾呢個引擎。嗯,應該話全個地球嘅人都係負責供電同整備呢副引擎。」

佢見我表情嚴肅,知道我唔係講緊笑,淨係「吓」咗一聲。

「幾百年前,地球各國用盡所有資源都係打唔低外星人,只係擊退咗佢哋。佢哋嘅艦隊受重創後,就泊咗響小行星帶度,一泊就泊咗幾百年。我哋唔知佢係維修緊,定係叫緊後援,只係知道當我哋祖先搭住殖民船投奔仙女座時,佢哋郁都無郁過。」

個孫終於從錯愕中醒來,問;「咁個超光速引擎莫非係等敵艦隊再侵略時,俾地球逃亡用嘅?」

「正正相反。當佢哋行動或者後援嚟到時,個引擎會將成個星球撞向外星人艦隊中心,同時引爆。爆炸能量應該細過小型超新星少少。」

「點...點解要咁做?」

「外星人打得地球,點解唔打得響仙女座嘅首都同其他星球?除咗響小行星帶嘅艦隊以外,我哋唔知邊度仲有外星人。亦即係話,我哋身處嘅太陽系,係人類唯一一條已知嘅防線,而我哋嘅母星就係人類文明史上最終武器。」

佢頹然坐咗響地下度,靜咗半响,望住窗外嘅發電塔,問:「咁如果聽日外星人艦隊開始活動,我哋係咪會即刻啟動引擎?」

我唔敢望個孫,唯有望住地板答:「係。」

佢又諗咗陣;「地球冇乜人剩,但每個鐘都有船去仙女座,係咪就係因為每個鐘,地球都有可能會撞去外星人度?」佢未等我講完個「係」字,即刻又問;「點解仲留我響地球度?」

「你可以搭下個鐘班船走。去到首都,中央政府會盡一切所能接濟你。」七十年前,我亦都問過我呀爺呢個問題,而佢亦都係咁答我。

穹蒼之上,月明星暗。我望住面前年輕嘅自己,重複我七十年前,去兮留兮嘅掙扎。

#sor囉呃咗你
#其實冇甜

全文 1049 字 (唔計英文、空格、標點)