(beta 公測版本)
< 返回

《山竹雜談》

作者:賴叔
日期:2018年9月16日

你試過喺陸上、喺樓宇入面暈船浪嘅滋味嗎? 2018 年 9 月 16 日,超強颱風「山竹」吹襲香港,令身處摩天大廈、卅幾樓嘅我有種不停搖晃嘅感覺。老實講,嗰下我真係驚時速超過 160 公里嘅颶風會吹冧層樓。

將山竹講成香港近 60 年來威力最強勁嘅颱風並唔過份。 2017 年嘅天鴿勁咩?山竹啲風更猛烈、水浸更嚴重。電視訪問大澳居民點樣準備防風措施,佢哋話汲取咗天鴿襲港嘅經驗,會加設水閘──事實證明,水位可以高處未算高,學費,交完可以再交。

除咗天鴿, 1999 年嘅約克、 1983 年嘅愛倫同 1962 年嘅溫黛一樣令人猶有餘悸。不過數字上,香港天文台都係話山竹嘅平均風速比較高。雖然 10 號風球嘅歷時冇約克嘅 11 小時咁長,但係令繁華嘅香港市面滿目瘡痍、杏花邨變水都、四萬戶停電,山竹真係唔少嘢。

山竹可能係香港史上,令天文台掛十號風球嘅熱帶氣旋當中,筆劃最少嘅一個。 (1906 年嗰個丙午颱風唔計啦好冇?) 如果你年紀夠大,應該知道以前香港叫呢啲氣旋做「風姐」,事關以前嘅熱帶氣旋清一色以女士名字命名。瑪麗 (Mary)溫黛 (Wanda) 、荷貝 (Hope) 、愛倫 (Ellen) 等「風姐」喺六十至八十年代為香港帶來災情。放諸 21 世紀,如果啲颱風仲用緊女士英文名,社交網絡上嘅惡搞應該都會幾大鑊。你試下颱風嘉莉 (Carrie) 或者維珍娜 (Regina) 襲港?

山竹同天鴿呢兩年嘅造訪,亦令天文台自 1961/1962 年之後,首次連續兩年要懸掛十號風球。係咪好甘?都未夠 1964 年嘅露比同黛蒂 (Dot…) 喺九月同十月梅開二度咁犀利。 2018 年會唔會嚟個 double up ?我估難少少,天氣開始轉涼,南海嘅海水仲夠唔夠熱量畀另一個颱風訪港?東北季候風嘅到來又係另一個打擊颱風結構嘅因素。

諗返以前,喺天鴿同山竹之前, 2012 年嘅韋森特同對上一個、 1999 年嘅約克相距 13 年。約克距離 1983 年嘅愛倫更加講緊 16 年。對於好似我呢啲 80 年代出世嘅人嚟講,約克可能係第一個有印象「打到正」嘅颱風。十幾年一遇變成一年度,幕後黑手當然係氣候暖化,海水溫度上升,令超強颱風呢啲怪物級嘅熱帶氣旋出現得更頻密。

至於話咩香港係福地,次次打大風都好似有「李氏力場」擋格而平安度過,我覺得都係廢話。香港面積本身細,要命中地圖上呢一小點,本來就唔容易。而香港人能否從山竹一役汲取教訓,抑或係抱住「個風未嚟到,都冇風,即係冇料到」、十號波先撤離都唔遲」、「十號波唔落嚟追風等幾時」嘅心態面對,都係適隨尊便。不過有咩事,唔好累咗要拯救你嘅人囉。

一百年前打風死亡數字成千上萬,係因為預報機制落後、好多水上人家、大埔沙田低窿地區仲有人耕田有牛周街走。一百年後,大家上撚晒樓,天文台又老早一星期提點大家,如果有咩依郁,原因只係大家冇用腦,或者腦退化。

全文 893 字 (唔計英文、空格、標點)