(beta 公測版本)
< 返回

《人走股揚,股市給林偉駿最後的玩笑》

作者:置地記者
日期:2018年8月21日

又一個 Blue Monday ,報章主要頭條皆為上市公司 CEC國際控股 (上市編號:759) 主席林偉駿猝逝。就咁講「CEC」你真係未必諗得起係咩公司,事關 CEC 起源於「高雅電業」,始創於 1979 年,到 1999 年以 CEC 名義喺香港上市,創業頭 30 年主要都係繞線圈、生產火牛等原始電子產品。要去到 2010 年,經歷過金融海嘯,林老闆先至開展新業務,亦即係今時今日街知巷聞嘅「759阿信屋」。

當年 CEC 仲係一隻毫子股,講緊係一兩毫水位上落,冇乜成交嗰隻。如果你睇返下面呢個圖表, 759 嘅股價都要去到 2012 年中先開始起飛,直至 2013 年年底, 759 由零食店殺入化妝品銷售,股價先至喺一個月內彈升三倍,最高見過 4.99 港紙。嚴格嚟講, 759 都算係一隻廿倍股嚟嘅,如果你夠早發掘到呢隻翻身股,又及時喺泡沫爆破之前離場嘅話。

喺時空上,林偉駿要去到 2011 年第四季先開始多傳媒訪問 (其實主要咪又係《蘋果日報》) ,當時阿信屋以「平行進口」 (即係水貨啦) 入口可口可樂,被香港代理嘅太古封殺, 759 以雞蛋嘅姿態硬撼高牆,得到唔少消費者以鋤強扶弱嘅心態支持。

往後阿信屋嘅評價各走兩極。公司業務迅速擴張,為嘅係符合成本效益,以零售網絡龐、薄利多銷嘅方法,將直銷入口嘅成本攤薄,極富林偉駿「廠佬」致力壓低成本以求獲利嘅影子。另一方面,阿信屋採購章法混亂、貨品供應唔穩定,加上擴張太急,連雲吞麵同茶餐廳都撈埋一份,難免令人懷疑 759 經營方向。

2015 年應該係我最後一次留意 759 嘅股價,其時順豐同阿信屋合作開辦聯營店,市場憧憬 759 會否被順豐收購。不過雙方合作九個月就已經進入冷靜期,而家再講都應該冇人會記得。反正順豐都已經喺深圳發行 A股上市,而 CEC 亦重返毫子股行列。

林偉駿早幾年曾經接受訪問,話有人問佢 CEC 賣唔賣盤,但係林偉駿斷言拒絕,話希望經歷過一個經濟周期起落,阿信屋業務仍然屹立不倒,到時再賣盤都唔遲。呢種一板一眼、腳踏實地嘅經營手法,始終係從事製造業嘅傳統思維。

可惜冇幾多個廠佬好似李嘉誠咁黐膠花黐到開花結果, 759 未賣到盤,林老闆就已經先行一步,得年 61 歲,以今時今日嘅標準當然係英年早逝。但計及佢本身似係「三高」嘅身形,以及為公司業務鞠躬盡瘁嘅生活,星落五丈原,似乎又係情理之中嘅結局。喺呢個時候離開,林偉駿留下嘅名聲始終係平價引入水貨零食嘅先驅,受到普羅大眾景仰,總算不枉。

置記成日講笑話,香港近年最蓬勃嘅製造業係「啤殻」工業,即係一堆建築工程公司砌靚盤數上市,隔兩年就將個上市地位以市價賣出。以 759 身處嘅「主板」為例,近年殻價徘徊喺六億至八億港紙之間。 CEC 近年業績見紅,市值跌至三億左近。

林偉駿一走,《蘋果》訪問競爭對手「優品360」老闆林子健,唔知有心定無意咁跌咗句 soundbite 出嚟話「十億以下有興趣」,股票市場旋即有反應, 759 股價爆升一倍,一度重上一蚊以上,市值回到六億水平。若然林老闆泉下有知,都真係唔知好嬲定好笑。

全文 970 字 (唔計英文、空格、標點)