(beta 公測版本)
< 返回

《英格蘭:似是故人來》

作者:置地記者
日期:2018年6月19日

英格蘭:似是故人來

四年一度嘅世界盃殺到埋身,中環人又如何免俗?置記作為意大利球迷,今屆賽事理論上關我叉事,不過香港人接觸得最多嘅往往係英格蘭超級聯賽,對於英格蘭總有多少情意結。適逢今日深夜英格蘭出戰首場分組賽,對來自北非嘅突尼西亞,我就開筆講兩句。

---

英格蘭教練修夫基沿用 3–5–2 陣式,前線由哈利簡尼及史達寧領銜,中場有連加特及阿里後上,輔以佐敦軒達臣出任防中,兩邊翼衛艾殊利楊格及查比亞瞻前顧後,三中堅麥佳亞、史東斯及卡爾獲加各有分工,門將碧福特把手獨木關。

英軍一開局節奏明快,三扒兩撥就有機會策動三線快攻,由佐敦軒達臣放個長傳畀阿里喺右路傳中,中間一輪混亂之後,連加特切入中路執個死雞,奈何省中門將。連加特及後左路出波畀史達寧,可惜史達寧步韻唔啱未能近門抽入。以上幾位年輕嘅英格蘭正選早段前場緊迫對手,為英軍製造一浪接一浪嘅攻勢。

終於,首個入波喺十分鐘出現:艾殊利楊格左路開出角球,遠柱嘅麥佳亞同史東斯都無人看管,後者頭槌攻門被門將拍出,哈利簡尼伏兵門前先開紀錄。

英格蘭喺開賽頭 20 分鐘所表現出嘅靈巧、迅速、各司其職,其實好唔英格蘭。如果你對於朗尼 hold 住個波唔知想點、林柏特同謝拉特喺中路格格不入等尷尬場面仍然記憶猶新嘅話。正如先前所講,英格蘭嘅三中堅各有分工,史東斯坐鎮中路分波;麥佳亞左路與艾殊利楊格配合;有死球攻勢更加係泰山壓頂頻頻埋門;卡爾獲加不時餵長波畀查比亞或阿里右路快放,令球隊進攻相當流暢。連加特勤力跑動亦為佢帶來兩次黃金機會,可惜一次喺尾柱撻Q ,另一次推過門將但係個波撞柱彈出底線。

---

睇波經驗有返咁上下嘅球迷都知道,當風和日麗、事事順境嘅時候,你冇好好把握機會,風水輪流轉嘅時候就可能遭受懲罰。突尼西亞攻勢唔係話特別多、特別到肉,不過一次傳中,卡爾獲加手快快㩒低咗對方嘅球員,就咁畀判罰十二碼,突尼西亞一聲唔該就扳平。英格蘭都有哈利簡尼喺混戰中被人箍跌,但係球證同 VAR 都冇乜表示。

下半場初段局勢冇大變化,突尼西亞企穩咗陣腳,英格蘭亦再冇行雲流水嘅攻勢。如果要點名批評,外號 $terling 嘅史達寧上腳過多,但又突破唔到對方嘅防線,傳送質素亦都麻麻地,比較令人失望。 68 分鐘,修夫基將呢位曼城前鋒換走,由曼聯青訓產品華舒福入替。

喺熱刺表現係威係勢嘅阿里今場唔知係咪太掛住丹麥隊友艾歷臣,表現同球會層面有一段距離,不過中路後上嘅任務有連加特分擔 (及浪費) ,佢喺右邊同熱刺隊友查比亞配合比較多,只可惜無法輸送畀箭頭哈利簡尼。 79 分鐘,洛夫斯捷克入替阿里,呢位車路士青訓產品喺右路都有幾次落底傳中甚具威脅。

不過,三獅兵團對住全軍退守、禁區周邊有八、九人佈防嘅突尼西亞,破解之法始終係死球戰術。補時一分鐘,佐敦軒達臣右邊開出角球,麥佳亞力壓群雄頂向遠柱,哈利簡尼再次伏兵門前頂入,總算令英倫三島球迷收貨,令 Facebook Newsfeed 醒一醒。

---

英格蘭今屆派出平均年紀僅僅過 26 歲嘅 23 人大軍,今場正選平均年齡更加只得 25 歲多啲,除咗年紀最大嘅係 32 歲嘅艾殊利楊格,其餘主力年紀介乎 23 至 27 歲, 11 名正選球員夾埋連 250 頂喼帽都冇 (根據 Wiki 及本人心算,總數係 248 ,平均每人 23 次上陣) 。如果你要一個參考數字,上一代巨星朗尼、謝拉特同林柏特代表英格蘭上陣次數係 119 、 114 及 106 次,即係而家英格蘭正選嗰班加埋先至同兩個名宿嘅經驗值差唔多。

難怪有說今屆英軍係近代星味最淡薄嘅一隊。不過隊中冇一個明顯嘅大佬,或者冇一堆性格巨星,都有好處嘅:大家都有鬥心追逐榮譽,大家都有潛質成為下一個梁朝偉,不過時間仲喺 1984 年,成班新紮師兄,其實冇咩條件耍大牌,只可以喺一代名將、踢而優則教嘅修夫基麾下服從團體指示。呢種整體戰,喺球員經歷過歐陸教練如哥迪奧拿、高普同普捷天奴嘅教導之下,基本上擺脫咗昔日英格蘭高Q 大棍、長傳急攻、一味靠快馬突破嘅悶局。

之不過,大賽經驗不足嘅初生之犢,點樣面對逆境、點樣喺國民期望甚殷之下重拾領前優勢,始終涉及心理質素問題。我唔係話有朗尼喺度會好啲,畢竟佢作為隊長,除咗唔錫力咁返中後場追波去鼓動隊友,其實領袖才能都係有限公司。但係當場上最富國際賽經驗嘅都已經係佐敦軒達臣同史達寧,而戴上隊長臂章嘅哈利簡尼本身唔係啲咩有感染力嘅領袖嘅時候,教練修夫基就有更大責任去訓詁呢班後輩,例如話攞返 1996 年歐洲國家盃自己射失十二碼嘅經驗嚟講⋯⋯ (誤)

---

首輪賽事過後, G 組榜首係比利時,英格蘭得失球差稍遜排第二,突尼西亞第三,榜末係巴拿馬,英格蘭要出線嘅話,其實唔難:只要嚟緊贏巴拿馬,而突尼西亞贏唔到比利時就搞掂。

又咁講,呢隊英格蘭可能志不在此,兩年之後嘅歐洲國家盃、四年之後嘅世界盃,先至係呢一代英軍大勇大熟之時,回望西班牙同德國兩隊登上世界之巔之前,同樣經過播種、栽種、收成嘅階段。修夫基如果可以繼續帶隊,頂得住國內傳媒嘅壓力,英格蘭呢班生力軍,或可再創 1966 一代嘅佳績。

#世界盃
#睇到呢度你會唔會賞面入Medium拍下手

全文 1764 字 (唔計英文、空格、標點)