(beta 公測版本)
< 返回

《歐聯決賽:沙拿傷出 門將派膠 造就皇馬三連霸》

作者:賴叔
日期:2018年5月27日

呢一場波嘅比數,應該加上兩個註腳:一:上半場入球數字係零,不過換人數字就係一比一。分別在於,皇馬換走嘅只係右閘卡華查,利物浦失去嘅係皇牌前鋒沙拿。二:利物浦門將卡列斯送咗兩個入波畀皇馬。

成場波最關鍵嘅場面發生喺上半場中段,當時沙拿喺前線迫搶、同皇馬中堅沙治奧拉莫斯爭波,不幸地沙拿畀沙治奧拉莫斯攝咗隻手入去格肋底下面,雙方失去平衡倒地之後,沙拿就拉傷膊頭肌肉 (好似係) ,雖然曾經勉強負傷作賽,但最終無法繼續作賽,淚曬球場。

講真,沙治奧拉莫斯踢波陰濕多茅招就唔係新聞,而利物浦嘅前場緊迫戰術對前線三叉㦸嘅體能要求都好高,季尾流流積累咗多少疲勞,再喺沙治奧拉莫斯有心 (或無意) 之間拉扯一下,沙拿嘅受傷實在不幸。

利物浦喺沙拿傷出之前都算佔上風,面對球員個人技術較佳嘅皇馬,紅軍以整體迫搶、快速反擊、靈活走位,好幾次爭啲可以入波。沙拿喺右路頻頻同沙迪奧文尼眉來眼去,時而切入中路,拉空畀雲拿當同阿歷山大亞諾後上,令皇馬後防險象橫生。

皇馬部署上基本上係七人防守,即係四人防線加三人中場線專注收緊空間,有波就靠摩迪或卻奧斯個人技術擺脫對方第一點攔截,放波畀 C朗或伊斯高發辦。 C朗一次右路長驅直進畸角位怒射僅僅越楣而出,另一次接應傳中頭槌攻門被門將擋出,賓斯馬補中入網可惜越位在先。

比賽首 15 分鐘令人諗起曼聯兩度喺歐聯決賽遇上巴塞隆拿,都係想一開始谷一段搏入一球然後穩守,因為知道「地上最強」波底好又搓得,無謂長時間鬥攻。不過利物浦喺領隊高普領導之下好明顯更加自由奔放,皇馬雖然個人技術比較好,但係整體組織就冇咁行雲流水。

遺憾在沙拿傷出,利物浦要用冇態嘅拉蘭拿入替,仲要將沙迪奧文尼由左邊推去右邊,成個球季行之有效嘅進攻體系完全走樣,球賽嘅可觀程度馬上大打折扣。

如果話上半場嘅戰況係一場相當典型嘅決賽,咁下半場就好似打街場咁開放式鬥攻。換邊冇耐就出現咗歐聯史上最奇撚怪嘅決賽入球:賓斯馬接應隊友長傳走位,但個波太深畀門將卡列斯沒收。卡列斯唔知係斷定賓斯馬好懶唔會埋嚟撲,定係時運高睇佢唔到,及不及待就將個波用手掟出去,殊不知賓斯馬就伸腳攔截,個波反彈慢溜入網。

利物浦好快憑一個角球攻勢扳平:路夫蘭壓贏沙治奧拉莫斯二傳,沙迪奧文尼飛身凌空窩利接應近門抽入。利物浦忽然間好似大脾畀針拮咁,醒晒,重新瘋狂喺前場迫搶。

60 分鐘,皇馬教練施丹換走伊斯高。呢位西班牙中場成場波都冇乜運仔,唔係射中楣就係近門轉身施射畀卡列斯飛身擋出。入替佢嘅係加里夫巴爾,事實證明,呢位威爾斯翼鋒冇伊斯高咁黑仔。

事關佢入替三分鐘之後就接應馬些路嘅傳中,施展左腳倒掛金勾反方向笠入死角。雖則呢球嘅姿勢分未必比得上 C朗拿度對祖雲達斯嗰球咁靚,但係喺決賽入球咁嘅靚波喎,都足以名留青史啦。

沙迪奧文尼之後都係有機會梅開二度,不過佢禁區頂刮個地波射中柱彈出。皇馬領先一球之後並無放棄進攻,但係 C朗拿度今場狀態認真麻麻,一係自己推下推下推咗落底線,一係埋門拖泥帶水畀敵衛嚟得切解圍。

去到最後十零分鐘,皇馬已經調整心態,冇波在腳就全隊喺半場內死守,有波亦唔急於反擊,希望消耗時間、消磨紅軍嘅意志。

更慘嘅係,門將卡列斯再度派膠,加里夫巴爾離門成三、四十碼抽射,卡列斯想用手槌擋出,但係姐手姐腳唔夠力,畀個波飛咗入網。落後到一比三,利物浦根本回天乏術。

沒有沙拿嘅利物浦,就好似 PIzza 冇咗蕃茄咁,唔好睇又唔好食。紅軍整個球季進攻順風順水,雖然偶有輪換但係整體上都係靠沙拿、費明奴同沙迪奧文尼開飯。 Plan B 如蘇蘭基、丹尼英斯或拉蘭拿根本唔係同一個層次、同一條頻道。如果張伯倫冇受傷嘅話,情況或者會好少少,但係高普情願換安利簡入替占士米拿,連第三個換人名額都廢事用,就知佢哋無計可施。

故事教訓大家,一隊波要獲得最後勝利,前線單靠一個核心帶起係太過冒險,後防就始終就始終需要一個老練、可靠嘅門將,唔係搵埋都唔夠蝕。

#歐聯決賽

全文 1432 字 (唔計英文、空格、標點)