(beta 公測版本)
< 返回

《歐聯決賽 上半場即時評論》

作者:賴叔
日期:2018年5月27日

上半場入球數字係零,不過換人數字就係一比一。分別在於,皇馬換走嘅只係右閘卡華查,利物浦失去嘅係皇牌前鋒沙拿。

沙拿喺前線迫搶、同皇馬中堅沙治奧拉莫斯爭波之際,不幸地畀沙治奧拉莫斯攝咗隻手入去格肋底下面,雙方失去平衡倒地之後,沙拿就拉傷膊頭肌肉 (好似係) ,雖然曾經勉強負傷作賽,但最終無法繼續作賽,淚曬球場。

講真,沙治奧拉莫斯踢波陰濕多茅招就唔係新聞,而利物浦嘅前場緊迫戰術對前線三叉㦸嘅體能要求都好高,季尾流流積累咗多少疲勞,再喺沙治奧拉莫斯有心 (或無意) 之間拉扯一下,沙拿嘅受傷實在不幸。

利物浦喺沙拿傷出之前都算佔上風,面對球員個人技術較佳嘅皇馬,紅軍以整體迫搶、快速反擊、靈活走位,好幾次爭啲可以入波。沙拿喺右路頻頻同沙迪奧文尼眉來眼去,時而切入中路,拉空畀雲拿當同阿歷山大亞諾後上,令皇馬後防險象橫生。

皇馬部署上基本上係七人防守,即係四人防線加三人中場線專注收緊空間,有波就靠摩迪或卻奧斯個人技術擺脫對方第一點攔截,放波畀 C朗或伊斯高發辦。 C朗一次右路長驅直進畸角位怒射僅僅越楣而出,另一次接應傳中頭槌攻門被門將擋出,賓斯馬補中入網可惜越位在先。

比賽首 15 分鐘令人諗起曼聯兩度喺歐聯決賽遇上巴塞隆拿,都係想一開始谷一段搏入一球然後穩守,因為知道「地上最強」波底好又搓得,無謂長時間鬥攻。不過利物浦喺領隊高普領導之下好明顯更加自由奔放,皇馬嘅組織亦冇咁行雲流水。

遺憾在沙拿傷出,利物浦要用冇態嘅拉蘭拿入替,仲要將沙迪奧文尼由左邊推去右邊,成個球季行之有效嘅進攻體系完全走樣,球賽嘅可觀程度馬上大打折扣。下半場皇馬應該可以更安心進攻,但贏唔贏到,都要講把握能力嘅⋯⋯

全文 622 字 (唔計英文、空格、標點)