(beta 公測版本)
< 返回

《黑彩虹女神》

作者:賴叔
日期:2018年5月20日

講到香港娛樂圈近年嘅「星二代」,當數鄭欣宜同謝霆鋒,其他當然有黃奕晨、楊天經同唔知係真唔係真嘅王祖南。 (早年嘅有吳君如⋯⋯)

鄭欣宜同謝霆鋒嘅有好多類似嘅地方,大家都係父母離異,大家都係唱歌,大家都有 Haters 。

謝霆鋒嘅出道,多少有賣身契嘅味道,同 EEG 簽長約,由早年嘅反叛青年掟結他,到而家已經升呢為老闆、 Chef LeMon ,再出返嚟唱歌 sell 《有火》都只不過係娛人娛己。如果你話謝霆鋒係十大傑青,其實都實至名歸。

鄭欣宜有啲唔同,由細細個開始已經跟住肥姐出席大小場合,表演慾極強,睇得出佢好享受備受注目,可謂 Wanna-Be 嘅先驅。欣宜之後飾演白雪公主錫啖吳卓曦招致大批觀眾投訴,又係另一個問題。近年,喺肥姐騎鶴仙遊之後,欣宜柔弱地 sell 自己堅強嘅一面,充份演繹後現代嘅矛盾與鬥爭,成為娛樂圈別樹一格嘅 icon 。

鄭欣宜兩年前嘅《女神》一曲成為無數港女自我勉勵嘅主題曲,「你是女神,不要為俗世收斂色彩」,令姊姊妹妹站起來,為波瀾壯闊嘅女權運動添加另一個層次。今年《黑彩虹》複製同一方程式,以 minorities 作切入點,灌注源源不絕嘅正能量,聽得人血脈沸騰,「你要愛得英勇」,幾乎就要前進前進前進進。

之不過,歌詞裡面嘅「你」,到底真係聽眾港女 ABCD ,抑或係欣宜對鏡自憐嘅鏡中花,就要大家自己獨立思考。畢竟喺得天獨厚、 Social capital 雄厚嘅背景下,塑造一個被壓迫、受排斥、逆流而上嘅 underdog 形象,真係需要無比嘅勇氣同臉皮,如果作詞人藉欣宜把口消費弱者,就真係未免太不該。

執筆時值初夏,且看年底樂壇頒獎禮,傳媒點樣報道或 build up 女歌手同歌曲獎嘅爭逐,自然知道觀眾嘅 perception ,which is also reality 。

全文 541 字 (唔計英文、空格、標點)