(beta 公測版本)
< 返回

《重游故地,我踩入知己之間嘅禁區》

作者:星爺
日期:2018年4月11日

【重游故地,我踩入知己之間嘅禁區】【唔甜】

講咗一個鐘大話,我終於有啲口渴,吸左啖芒果冰茶。

「呢間café幾chill吖,我得閒帶啲客過嚟傾嘢先°」但其實我做back office根本唔會見客。

佢似笑非笑咁望左我一眼,然後食埋佢杯入面最後一粒冰。

「最衰我呢排個schedule塞到爆晒。唉我老細panic囉,臨時臨急將啲project deadline推前晒。你知啦,而家我呢個post,成間公司冇咗我唔得架嘛。」

「不如一陣返學校行下?」佢終於開聲。

「暑假喎,學校會有人開門俾我哋咩?」我唔知點解有啲唔想返去。

「你估真係一個人都冇咩,有校工住響學校入面架嘛。」

「但係我杯野未郁過咁滯喎。」我嘗試作藉口。

佢笑咗笑:「梗係啦,你成程掛住吹水。」我屹咗屹,睇唔出佢話我吹水係咩意思。

我哋行左返學校,校工見到佢就即刻開門。

「吓乜你成日返黎架?同校工咁熟嘅?」

「係呀,呢度個sound booth好用吖嘛。」佢答完我之後即刻問:「你仲記唔記得我哋報大學嗰陣應承過大家啲咩?」

「吓,有應承過任何嘢咩?」我笑笑口拎轉頭,想逃避佢嘅目光。

佢直視咗我兩三秒之後,話:「你講大話。」

「我哋嗰陣應承大家無論揀咩科都好,都要繼續拍片,畢業之後一齊拍一套cult到爛嘅警匪片丫嘛。」我無奈答道。「不過呢啲青春夢想嘢唔啱我架喇。」

「你又講大話嘞。我哋中三玩到而家,你實知我睇得出你講大話革。」佢似笑非笑咁望住操場,然後突然語調一變:「我之前上網仲見到你大學拍嘅片。我一直以嚟都諗唔明,既然你冇放棄追夢,點解你一直都唔搵我?而家要扮晒同我sell公司嘢,先約我出嚟?」

我諗左陣,諗緊點樣可以最沉穩地表達我嘅鬱憤:「響中學嗰陣,我一直都覺得自己唔係中中庸庸,只係未發力啫,只要我畀心機拍片,一定做到香港最頂尖嘅導演。但係去到大學,我先發覺呢個世界好大,而我出盡力水都追唔上周圍最頂尖嗰一班人。」

「再用力都只係做到二三流,你唔覺得成件事好殘忍咩?我接受到自己係個一流嘅業餘,但我接受唔到專業嘅世界,自己係個二三流。我好攰喇。

「我知道你而家響跟人做緊PA,想一步一步做上去,但我唔想面對自己冇你咁有魄力呢個事實呀!」

我一輪嘴咁講,但係佢今次冇似笑非笑,而係望住地下。佢諗唔到俾咩反應。自此以後,我哋多左約出嚟敘舊,但係傾咩都好,都冇再傾電影嘅嘢喇。

係識咗咁耐,先至有呢個默契。

全文 765 字 (唔計英文、空格、標點)
備註: 2018 年 DSE 中文作文題目大雜燴