(beta 公測版本)
< 返回

《這些機會…只係睇你啃唔啃得落》

作者:散彈一號
日期:2018年1月1日

據維基百科所述,Unix 大概係 60、70 年代期間開發,一開始只係用於少數科技公司同大學嘅電腦、數學部門。之後十幾廿年,雖然用戶數量一直上升,但都唔算廣為人知。去到 90 年代,微軟壟斷個人電腦市場,一般人只知 Microsoft Windows 而唔知咩係 Unix。當時 Unix 嘅支持者大部份都係吹淡風,覺得微軟呢個「大魔王」不日就可以「一統天下」,消滅 Unix 嘅勢力。

點知轉眼十幾年,到咗 201X 年,Unix 同 Unix 衍生出嚟嘅系統已經滲透全世界每一個角落。你用緊嘅手機,無論係 iOS 定係 Android,都係參照 Unix 所設計嘅系統嚟。近年最有趣嘅新聞係,Windows 10 可以行 Ubuntu,兜兜轉轉 Windows 反而被 *nix 系統同化。

世界上好多嘢,唔係線性(linear)增長,而係短期內發生 exponential growth。好多嘢你努力但睇唔出成果,未必代表冇進展,只係時間未到。時機一到,水到渠成,但靠嘅唔止係運氣,而係經以年計嘅默默耕耘。

香港人講究嘅係收獲要同付出成正比,但呢個世界所有成功嘅嘢都唔係咁樣計法。或者無止境地投放時間精力落一樣嘢度係「on9」,但所有做大事嘅人物起初都係「on9」嘅,又或者佢哋係站在更多名不經傳嘅「on9仔」嘅膊頭上,靠好多大家未知嘅傳承、資本,贏在起跑線。

有好多嘢要「深耕細作」幾十年先至有成果,今日大家見到嘅「果」,好多時都係幾十年前種下嘅「因」。除非你真係先知,否則又點會睇到原來當年一個咁微不足道嘅嘢,過幾十年會變得舉足輕重。

近排不斷反思,其實人如果肯勤力同埋夠進取,抓緊機會,機會好多時都仍然存在嘅。好多時機會真係嚟到,人係會怕煩、怕忙、怕風險而放棄。所謂「冇機會」,其實同靚女話「冇人追」一樣,只不過係愛唔愛,只不過係取捨而已。唔係話做人一定要不顧一切向上爬,只係話,你想嘅話總有呢啲機會,只係你未必啃得落咁解。

全文 574 字 (唔計英文、空格、標點)