(beta 公測版本)
< 返回

《酸咗嘅西瓜》

作者:雞絲陳
日期:2017年7月10日

媽咪叫我食西瓜,佢話雪櫃有兩盒,唔知叫我食大嗰盒定細嗰盒。我求其應「哦好呀」,過咗幾個字先去攞嚟食。
 
打開個盒酸酸地,我仲諗:「係咪雪櫃其他嘢酸咋?(其實雪櫃好似得西瓜同今日先煲嘅綠豆沙)」食落都好似酸酸地,我仲諗:「係咪唔甜所以顯得酸咋?」於是食咗三四舊。
 
阿媽晾完衫返入屋,我話:「媽,啲西瓜好似變咗,我聞落去酸酸地,食咗三四舊都酸酸地。」「喂呀!我咪叫你食大嗰盒囉?呢盒早兩日咖,我切嗰時都覺得唔靚,大嗰盒先係新鮮咖…呢盒我諗住轉頭掉咗佢咖喇…」
 
我:「哦~~~」
媽:「你點解會食呢盒咖…🤦🏻‍♀️」
我:「我聞到酸酸地呀,但係我諗住佢只係唔甜啫…🤷🏽‍♀️」
媽:「唉呀…你麥兜嚟咩…咁…咁豬嘅?🤦🏻‍♀️」
我:「咩呀所以我食咗四舊之後咪停咗囉~無所謂啦應該冇事嘅~🙆🏽」
 
阿媽拎起我食嗰盒,聞一聞就話:「變咗啦!酸得咁明顯!」然後我聽到佢一入房就同老豆講:「你個女呀…食咗早兩日嗰啲西瓜呀…酸咖佢仲食…仲食幾舊先停…」我衝入去:「做咩講我!無所謂啦食咗四舊啫~」
 
之後我返房上網…個肚開始嘰哩咕嚕。聽到阿媽行咗出廳,我就嗌:「媽!我個肚真係開始有聲喎~」阿媽打開我房門,望住我,哭笑不得咁話:「咁點算呀…慘啦…你到底點解會明知酸明知變咗都繼續食咖…?」個樣勁憐惜我sosad。
 
然後我又聽到佢返房同老豆講:「你個女個肚開始咕喇…」
 
Sosad真係養兒一百歲,長憂九十九…Sorry我自理能力係比較弱…媽媽唔好唔要我。><
 
我都唔知點解我明明聞到同食到啲西瓜變咗都會繼續食。我判斷到啲西瓜變咗咖,但係唔知點解我判斷唔到「變咗嘅嘢唔好塞入口」sosad,好似都唔係第一次。🤦🏽‍♀️

全文 527 字 (唔計英文、空格、標點)