(beta 公測版本)
< 返回

《做家務》

作者:雞絲陳
日期:2017年6月3日

小學嗰陣老豆要我哋三兄弟姊妹每人認領一啲家務,第日就專做嗰啲家務。都好嘅,認咗頭就commit落去做,唔使日日喺度推嚟推去。當年有三樣嘢揀:1. 洗衫+晾衫、2. 執枱+掉垃圾+摺衫(初中開始養狗就加埋放狗)、3. 洗碗。
 
我嗰時覺得落機洗衫要掂啲臭衫好難頂,又覺得晚晚都要出門口掉垃圾好煩(宅到𨋢口都唔想出),於是我揀咗洗碗,自此就洗咗十幾廿年碗。加上我唔識煮飯,老老實實切嘢都唔係好識,只係勉強識洗幾條菜,所以長大之後去人哋屋企食飯/打邊爐,我都會幫手洗碗。預備開飯我就幫唔到手咖喇(唔好意思真係有啲驚揸刀,覺得拎起刀好容易失控斬自己隻手lol),唯有臨尾幫手洗晒啲碗佢等主人家唔好咁辛苦啦~
 
其實係唔鍾意洗碗咖,不過洗下洗下就慣。細個會偷懶,會拖延,搏阿媽頂唔順啲碗擺咁耐自己洗返(咁我通常唔會擺過夜嘅,至多擺到凌晨)。每次阿媽喺我洗之前郁咗手,老豆就會話我:「你真係錫阿媽就唔好俾你阿媽搶咗啲碗嚟洗。佢返工已經好攰,返到嚟煮完飯應該休息,家務應該你哋分擔多啲。」我總係會駁嘴話:「我諗住洗咖,佢搶咗嚟洗咋嘛。🤷🏽‍♀️」通常去到嗰個時候就算我入廚房話我洗返(門面功夫做下樣都要嘅),阿媽都會話「唔緊要啦我洗完咖喇」,然後我又會好衰女咁攤攤手同老豆講:「阿媽唔俾我洗呀,我都冇法。🤷🏽‍♀️」老豆都知我籠嘢,但無論佢點勸我媽「你擺低俾啲仔女做啦」我媽都唔會理(事實我媽係好賢淑嘅,潮州女人嘛,oh btw我都係🙆🏽)。於是老豆會改為咁樣洗我腦:「下次你阿媽再走入去洗嘅話,你要同佢搶。你明知你媽性格係咩都自己做晒,咁你就要搶先過佢做。你真係錫阿媽呢,就要搶嚟做。你要同佢講如果佢幫你洗咗碗,阿爸係會鬧你。」雖然無奈,但因為老豆呢招太煩,我唯有乖乖地照做。過咗一段時間,我終於接受咗我喺屋企係洗碗大臣,每晚爽手洗咗佢就算。
 
再後嚟大嗰啲,譬如去到會考高考咁,阿媽通常又會好體諒,成日幫我洗碗。到我哋出咗嚟做嘢,其實大家都做少咗家務。我記得阿哥初初出嚟做嘢時已經冇做佢負責嗰樣「執枱+掉垃圾+摺衫+放狗」,阿媽話阿哥做嘢辛苦體諒下。我以前仲會嘈,話唔公平,點解我畢業出嚟做嘢又繼續要洗碗blablablah…再過咗輪我又開始覺悟:雖然我盡量晚晚洗碗,但有啲家務例如搬搬抬抬嘅野係只有阿哥細佬先幫到手,嗰啲時候我都係行行企企看下車,其實冇得咁樣計話人人做晒同一堆嘢先叫公平嘅。
 
而家阿哥結咗婚搬咗出去,細佬又要返工又要讀書都少咗洗衫(同埋承上段,都冇得咁計嘅),我盡量會洗碗(就算有時我冇喺屋企食,啲碗係佢哋煮完麵未洗都好啦),有時放假會洗下衫晾下衫(但多數都係阿媽洗orz)。不過如果爸媽知我嗰排工作好忙人太攰,都會好體貼咁話幫我洗碗。前排做嘢真係好忙同好攰,食完飯阿媽話幫我洗之餘仲要好溫柔咁講句:「唔使洗啦,我幫你洗啦,你抖下啦傻豬。」嗚呀~阿媽到而家仲會嗌我傻豬lol~♥
 
今日我收晏,返到屋企兩老已經食完飯食緊雪糕。我食埋飯之後老豆又話:「我幫你洗啦今日~」呢幾日我總算忙完,有力洗碗,我話:「下唔使啦,淨返好少碗咋嘛。」老豆話:「我頭先都洗咗一半啦,我洗埋佢啦幫你。」「哈咁我更加要洗啦,少碗我洗,下次多碗你幫我洗呵呵。」洗嗰時聽到阿媽話想洗衫,老豆勸佢早啲瞓(但老豆冇諗住幫佢洗衫囉🙄)。我話:「你洗衫啦,洗完我晾。」阿媽話:「好呀~咁我唔客氣喇~~~」
 
兩老好快就瞓咗,我啱啱出露台晾衫,先知原來夏天夜晚出面嘅少昆蟲係多得咁交關!!!!!!一路晾一路驚(除咗蚊之外任何飛嘅生物我都驚啊,好驚佢哋撞埋嚟),一路覺得媽媽真係好偉大嗚嗚嗚嗚。出面又多蚊,又多醜樣嘅飛蟲,阿媽都係咁日日洗衫晾衫,真係太偉大。T^T
 
我愛媽媽,不過下次都係唔好亂咁offer幫佢晾衫。我下次會講:「你落完機去瞓啦,叫細佬幫你晾啦。」真乖。^O^/

全文 1299 字 (唔計英文、空格、標點)