(beta 公測版本)
< 返回

《你屌你嘅陽關道 我插我嘅獨木橋》

作者:林非
日期:2017年5月25日

我好重視一樣嘢,就係大家應該有各自表述嘅自由。
 
各自表述嘅潛台詞係包括:你可以表達你嘅感受,由大家觀察到同樣嘅事實做出發點,你可以有你嘅演繹,我亦可以有我嘅觀點。只要大體上事實無重大分歧,你睇法同我唔同,其實係毫無問題,重要嘅係大家都可以暢所欲言。左膠之所以惹人厭嘅其中一個原因,就好似當年(即係上年呀) Donald Trump 當選後好多美國評論人所講嘅,當你一講「You must not say that」時,就係助長緊啲人去投票畀 Trump。詳情自己搵返上年啲片,不贅。
 
所以,老實講,彭秀慧套片被發行拎咗去濕鳩電影節呃獎,係咪柒?咁我都覺得有啲柒嘅,但係咪接受唔到?其實又唔係喎。老老豆豆,個世界係咁樣運作咗好耐啦,之所以有呢個濕鳩電影節就係因應呢種規則之嘛。咁為咗宣傳,唔通唔去做?做咗可能真係助長到下聲勢,「無成本點解唔做?」。當然啦,同樣地,指出個電影節有幾濕鳩,亦無咩問題,不過於我個人嚟講唔會影響到我會否入場睇囉。(對唔住係唔會睇嘅,我想睇舞台劇版多啲)
 
另一樣嘢係臨落飛機玩直播開手機。其實我睇過唔少片段係話飛機上不能用手機,喺近年係近乎一種「信佢不如信智慧下墜論」嘅都市傳說,如果開下手機會搞到「醉雞」,咁每日唔知幾多架飛機出事啦(佛祖保祐,飛行安全好重要。以香港網民文字理解力會以為我鼓吹失事)。咁你話係咪「唔守規矩」,絕對係,根本就係事實,但係咪罪大惡極,應剝奪上網權利終身?未必。咁你話貼佢出嚟批鬥,都唔係剝奪上網權利終身啫,啱!所以我唔會阻止人咁做。
 
低分教師。有朋友話佢識得一個人,以為會考係有八分底分。咁對於啲「一路成績好好嘅人」嚟講,會考個位數其實真係匪夷所思,自己都做唔好又點教人呢?呢個講法係好有道理㗎,但同一時間亦有人話「點解唔畀次機會人」「佢可能更加了解學生嘅困難」,講真,我都覺得錯唔晒㗎喎。
 
我諗起好耐之前聽一位醫生講過,話佢遇過一個「老醫生」,好自豪咁話自己畢業二十幾年,一本書都無再睇過云云。即係佢嘅醫學知識係無增進過。我覺得呢種「在職心態」先係真正最決定一切。你細個成績好好,入埋天之驕子乜乜乜嘅醫學院又點?之後無再進步過喎。同樣地,我知道無論邊一行,都有好多人係以「可以混日子」自豪,教書嘅唔使學嘢,社工嘅唔使學嘢,乜乜物物每日只係等收工返屋企睇 TVB 跳起 yeah BBQ WTF。咁如果個人生態度係咁,即使佢當年係麥明詩咁10優又點?一樣係不能傳道授業解惑。相反,如果一個人細個成績好差,但後來唔知幾時唔知點解發憤,誨人不倦(好多老式壞教師係侮人不倦,有特定對象,絕非以偏概全),每日精進修業,咁佢當年嘅會考成績係點,就好似政府高官形容六四(但今次係形容準確)咁,「只係歷史中嘅微塵」,甚至係激勵學生嘅笑談。
 
所以我比較想量度嘅係一個人對於生命嘅熱愛係點,一個人對於精進自己嘅要求係點,多過以往佢係點。因為當年差嘅開始,其實佢要追返個進度,係比其他人要做得更辛苦。如果只係掩藏喺左搭右搭嘅文憑咁上,最後有幾多真材實學真係會叫人懷疑嘅。

全文 1049 字 (唔計英文、空格、標點)