(beta 公測版本)
< 返回

《淺論香港嘅階級》

作者:散彈一號
日期:2017年4月17日

喺封建嘅時代,王公貴族計算子嗣嘅時候,首先計咗「正室」所生嘅仔,如果正室冇子嗣,迫不得已先輪到妾侍。

一直以嚟,我被自由主義論述洗鳩咗腦,以為呢啲就係咩「父權」、「階級」嘅表現,可見以前社會幾咁封閉。但係,我後嚟讀多咗書,見識多咗,慢慢體會到呢個制度嘅必要性。

一言概之,就係「家教」。

以前嘅社會,冇任何義務教育。父母就成為孩童教育之中最重要嘅一環。好多王公貴族公務繁忙,所以教育子女嘅責任,就落在母親身上。貴族嘅子女能否受到良好教育,就睇母親本身嘅學養。

母親嘅學養,同佢嘅階級直接掛勾。

職業無分貴賤(應該係?),但職業之間大有不同。例如中國分「士農工商」,王公貴族謂之「士族」,大概係四民裡面嘅「士」。士族子女要學嘅,係政治、歷史、禮儀等等;但如果母親出身於另一個職階,例如係商人家族,佢就只教到個仔點樣計數賺錢。

所以點解古人娶妻要講究「門當戶對」,點解「庶出」嘅仔女地位咁低,唔只單只係「階級觀念」作崇,而係因為子女教育嘅實際問題。你諗下,如果「娶老婆包埋幼稚園/小學老師」,好多香港人娶老婆隨時會要求佢有張教育文憑。

可能有人心諗:「呢啲嘢關我 L 事? 今時今日,仲有人講『階級』架咩? 」 有架,只不過香港嘅「階級」排序唔係「士農工商」,而係倒返轉,「商工農士」!

香港人「搵錢至上」,我諗係不證自明嘅。商人階級地位超然,你諗下姓李嘅、姓郭嘅、姓鄭嘅,就算佢哋嘅公司有時「為富不仁」,但佢哋喺香港嘅地位係從來冇人質疑嘅。

反觀香港嘅政治人物,無論係建制或反建制,其實都係過街老鼠。雖然「制度上」官員同議員嘅地位係高,但喺絕大部份香港人眼中,官員係俾市民鬧嘅,議員做嘢就係「搞事」,總之搞政治嘅都唔係好嘢。

香港嘅「士」階級賤過地底泥,係鐵一般嘅事實,只要大家細心觀察就不難發現。香港大部份家庭嘅「家教」就係:讀好啲書,第日搵返份好工,賺多啲錢,買返幾層樓。萬一有人搞政治,哇,咁就大鑊喇。佢哋嘅下場同「class traitor」無異。係呀,香港地梗係有「class traitor」架啦。香港 99.99% 嘅家庭都自以為係「商人」階級,你想去做技術工人?你想去耕田?你想⋯搞政治? 隨時俾人六親不認呀。

香港唔係從來未有過「士人階級」,不過自九十年代開始就冇咗⋯⋯ 因為以前係英國人做。如果大家記得八十年代、九十年代發生咩事,就係英國同中共聯手,將香港嘅政治權力交咗俾香港嘅商人。大家記唔記得第一屆特首選舉嘅候選人?三個當中有兩個就係香港嘅富商。

商人搞政治當然係搞唔掂。好多嘢,真係要由細學起,慢慢浸淫,唔係話你識得賺錢就一定識得治國 (你以為真係有「覺醒」技能架? 返去玩 P&D 啦⋯)。所以自此以後,香港嘅政治就亂到九彩了。

過咗廿年,仍然未有任何跡象顯示香港會有一個「士族」嘅階級出現。我諗冇架喇,正常人只會希望向上流。俾你揀,你想做李嘉誠定係做曾蔭權? 我諗地盤扎鐵嗰個工人,都未必會想做曾蔭權呀。你話香港嘅情況幾咁 messed up。冇得搞架,你估古人咁辛苦維持「門當戶對」真係純粹屎忽痕咩? 要構建同維持一個「士人」階級,好難架。孔夫子畢生精力就係做呢樣嘢,你唔係覺得自己有佢咁勁呀? :0)

如果係咁,香港點算? 好簡單啫,我哋用返商人思維,本地缺乏嘅,咪輸入外地嘅專材囉。呀,我意思係內地嘅專材。中聯辦成棟嘢咁多辦工室,唔通入面個個都係返工望住個市炒股票炒樓咩係咪?中國共產黨有幾千萬人,輸入幾千幾萬個都唔難啫。在一國兩制之下,香港人緊循黨嘅領導,繼續開心搵錢,唔使搞政治,真係最完美嘅解決方法呀。

----
... 喂,張主任肯俾我投共未?

全文 1195 字 (唔計英文、空格、標點)